Belgilenbegen jerden poıyzdyń jolyn kesip ótken aqtóbelikter aıyppul tóledi
AQTÓBE. QazAqparat - Aqtóbede «Temirjol asa qaýipti aımaq» reıdi ótti. Sebebi, mýzyka tyńdap kele jatqan er adam júrdek poıyzdyń daýysyn estimeı qaza bolyp, taǵy bir adam aıaǵynan aıyryldy, dep habarlaıdy QazAqparat tilshisi.
Aqtóbedegi temir jol boıynda búgin reıd júrdi. Sebebi, qala turǵyndary temir joldy kez kelgen jerden kesip ótýdi ádetke aınaldyrǵan. «Temir joldy kez kelgen jerden kesip ótý qaýipti. Qulaqqap kıip, júrdek poıyzdyń kelip qalǵanyn kórmegen er adam oqıǵa ornynda mert boldy. Sondyqtan búgin «Temirjol asa qaýipti aımaq» taqyrybynda túsindirý jumystary júrgizildi. Zań boıynsha temirjoldy belgilenbegen jerden ótkeni úshin adamdarǵa aıyppul salynady», - dedi Aqtóbe stantsııasyndaǵy ishki ister jelilik bóliminiń baspasóz ınspektory Roza Tólegenqyzy.
Aıta keteıik, jyl basynan beri temirjoldy belgilenbegen jerden kesip ótken 614 adam ákimshilik jazaǵa tartyldy. Olardyń árqaısysy 7 myń teńgege jýyq aıyppul tóledi.
