Belfast qalasyndaǵy jappaı tártipsizdikter nátıjesinde 60 polıtseı jaraqattandy
ASTANA. 8 qańtar. QazAqparat - Soltústik Irlandııanyń Belfast qalasynda bes kúnge sozylǵan jappaı tártipsizdikter barysynda 60-tan astam polıtseı jaraqat aldy, dep habarlaıdy BBC News saıty.
3 qańtardan beri onyń 100-ge jýyq qatysýshysy ustalyp, qamaýǵa alyndy. Soltústik Irlandııa polıtsııasynyń bas konstebeli Mett Beggott (Matt Baggott) atap ótkenindeı, olardyń deni jastar, al qaladaǵy tártip buzýshylardyń arasynan, tipti 10 jasar balalardy da kóz shalýǵa bolady.
BBC News-tiń habarlaýynsha, tártipsizdikterge qatysyp jatqan toptar polıtseımen de, bir-birimen de qaqtyǵysyp jatyr. Belfast qalalyq keńesiniń ǵımaratyn polıtseıler toby kúzetýde. Narazylyq bildirýshilerdi tynyshtandyrý úshin polıtseıler sý atqysh qurylǵylardy paıdalanýda. Associated Press agenttigi habarlaǵanyndaı, birneshe kólik órtelgen.
Atalmysh tolqýlar Belfast basshylyǵy resmı ǵımarattarda brıtandyq baıraqty tek naqty belgilengen kúnderde ǵana kóterýdi qaýly etkennen keıin bastaldy. Sheshim 3 jeltoqsan kúni jasalǵan jáne sodan beri jergilikti zań shyǵarý organdarynda talqylanbaǵan. Qaýly boıynsha, brıtandyq baıraq Belfast keńesi ǵımaratynda 9 qańtar kúni - Kembrıdj gertsogınıasi Keıttiń týǵan kúninde kóterilýi tıis bolǵan.
