Belesteri áleýmettik jobasy jańa maýsymyn bastaıdy
ASTANA. KAZINFORM - «Belesteri» («Ósý baspaldaqtary») áleýmettik jobasynyń uıymdastyrýshylary jańadan kásip bastaǵandarǵa bilim beretin kezekti maýsymy men jyl saıynǵy granttar baıqaýynyń bastalǵany týraly habarlaıdy.
Barlyq tilek bildirýshiler úshin iskerlik negizderine oqytý, onyń ishinde «jasyl» tehnologııalardy qoldana otyryp, aýyldyq jerlerde bısnes júrgizýge arnalǵan tegin qoljetimdi bilim https://ccb.kz jáne https://farmerschool.kz veb-saıttarynda ashyq. Baǵdarlama Qazaqstanda 12 jyl qatarynan jumys istep keledi.
Bilim alǵany týraly sertıfıkat alǵannan keıin 2 myńnan bastap 4 myń dollarǵa (teńge túrinde) deıin qaıtarymsyz grant beriletin konkýrsqa qatysa alasyz. Ol úshin baıqaýǵa egjeı-tegjeıli bıznes-jospar usyný qajet. Ótinish berý erejeleri https://ccb.kz saıtynda kórsetilgen. Bıyl baǵdarlama aıasy keńeıtilgendikten, granttar baıqaýyna áıelder ǵana emes, jastar da qatysa alady.
«Aýyldy qoldaýdyń memlekettik sharalary týraly qajetti aqparat alý jáne ony óńirlerdegi aýdıtorııamyzǵa jetkizý, qoǵamdyq uıymdar men bıznespen yntymaqtastyqqa arqa súıeı otyryp birlesken baǵdarlamalardy josparlaý úshin seriktestiktiń barlyq taraptary úılesimdi áreket etýi qajet», - dedi Qazaqstannyń Aýyl áıelderi forýmy uıymdastyrý komıtetiniń tóraıymy Maıra Aısına.
«Bıyl biz ınnovatsııalyq bilim berý platformamyz – ccb.kz veb-saıtyna oqý baǵdarlamalarynyń jańa baǵyttary men jańartylǵan oqý modýlderin qostyq, bul sabaqtardyń praktıkalyq mánin barynsha arttyrý úshin qoldanbaly sıpatyn kúsheıttik. Sondaı-aq bıyl alǵash ret tek áıelderge ǵana emes, 18-30 jas aralyǵyndaǵy jastarǵa da granttar baıqaýyn bastaımyz», deıdi «Belesteri» jobasyn «Jasyl ekonomıka jáne G-Global damýy úshin koalıtsııasy» ZTB-men birge júzege asyryp jatqan «Áleýmettik dınamıka» Qoǵamdyq qorynyń dırektory Elena Ojgo.
Jobanyń jańa maýsymy dástúr boıynsha Astanada baǵdarlama uıymdastyrýshylary men seriktesteriniń, Áıelder isteri jónindegi ulttyq komıssııasynyń, QR Eńbek jáne halyqty áleýmettik qorǵaý, Ekonomıkalyq damý jáne Aýyl sharýashylyǵy mınıstrlikteriniń ókilderi, «Atameken» UKP men taǵy da basqalary qatysqan konferentsııadan bastaý aldy. Májiliste aýyldyq eldi mekenderdi jumyspen qamtýmen qosa, kásipkerlikti damytýǵa qoldaý kórsetýdiń ózekti máseleleri talqylandy.
Sondaı-aq bıyl Belesteri jobasynyń aıasynda «Qazaqstan aýyldyq áıelderiniń forýmy» óz jumysyn jalǵastyrady: óńirlerde tórt forým, al kúzde Astanada granttyq baıqaýdyń jeńimpazdary marapattalatyn qorytyndy Respýblıkalyq forým ótedi.
«Belesteri jobasy Qazaqstandaǵy áıelderge ózderiniń jany qalaıtyn kásippen aınalysyp, otbasylyq tabystaryn arttyrý múmkindigin usynady. Osy 11 jyldyń ishinde 100 myńǵa jýyq áıeldi oqytsaq, olardyń jartysynan astamy – osy sońǵy 4 jylda tanymal bolǵan onlaın-oqytýǵa qatysty. 2020-23 jyldardaǵy túlekter Qazaqstanda 10 myńnan astam jumys ornyn qurdy. Búkil eldegi júzdegen qyz-kelinshekter jańa oqý jylynyń bastalýy men granttar baıqaýyn taǵatsyzdana kútip júr. Bul – biz úshin eń úlken moıyndaý», deıdi joba úılestirýshisi Aleksandra Akkırman.
Ótken jyly joba úılestirýshileri áleýmettik jobalary úshin bedeldi memlekettik «Paryz» syılyǵyna ıe bolsa, Belesteri Qazaqstandaǵy Amerıka Saýda Palatasy jyl saıyn ótkizetin baıqaýda «Qoǵamǵa qyzmet etý – iri kompanııalardyń jobalary» nomınatsııasy boıynsha úzdik joba retinde tanyldy.
