BelAZ basyp ótken kólikte bolǵan úsh jumysshynyń jaǵdaıy qalaı - dáriger anyqtamasy

QARAǴANDY. QazAqparat – Qaraǵandy dárigerleri «Molodejnyı» razrezinde «BelAZ» júk kóliginiń astynda qalyp qoıǵan jumysshylardyń jaǵdaıy týraly aıtty, dep habarlaıdy QazAqparat tilshisi.

«28 tamyzda Osakarov aýdandyq aýrýhanasyna úsh jumysshy tústi. Olardyń ekeýi jeńil jaraqat alǵan. Dárigerlerdiń tekserýinen keıin olar ambýlatorııalyq emdelýge jiberildi. Úshinshi naýqasqa jilinshik synǵan, sol jaq jambas shyqqan degen dıagnoz qoıyldy. Ol dárigerlerdiń baqylaýynda», - dep málimdedi oblystyq densaýlyq saqtaý basqarmasynyń baspasóz qyzmeti.

Eske sala keteıik, 28 tamyzda «Molodejnyı» razrezinde «BelAZ» avtokóliginiń júrgizýshisi burylǵan kezde kenish qyzmetkerleri mingen «ÝAZ» kóligin basyp ótken.

Oqıǵa saldarynan 1982 jáne1985 jyly týǵan eki jumysshy oqıǵa ornynda kóz jumyp, úsheýi aýrýhanaǵa jetkizilgen bolatyn.