Belarýste zeınetkerlerdiń «jasyna baılanysty» qosylatyn tólem somasy artty
ASTANA. KAZINFORM – Belarýs Respýblıkasynda 1 mamyrdan bastap zeınetaqyǵa «jasqa baılanysty» qosymsha tólemderdiń mólsheri artty. Bul týraly BELTA agenttigi habarlady.
BR Eńbek jáne áleýmettik qorǵaý mınıstrliginiń aqparatyna súıensek, 2026 jylǵy 1 mamyr men 31 shilde aralyǵynda bul tólemder 2,5%-ǵa ósip, 75–79 jas aralyǵyndaǵy azamattar úshin 95,56 rýbldi qurady, al I toptaǵy múgedektigi bar adamdar úshin – 222,97 rýbl. 80 jastan asqan azamattarǵa (kútimge arnalǵan ústemeaqyny qosa alǵanda) 191,12 rýbl tólenedi, al I toptaǵy múgedektigi barlar úshin bul soma 254,82 rýblge jetti.
Mınıstrliktiń málimetinshe, zeınetaqyǵa «jasqa baılanysty» qosymsha tólemderdi 75 jastan asqan 563 myńnan astam adam alady. 2026 jyly bul tólemderge jumsalatyn shyǵyn shamamen 980 mln rýbl bolady dep boljanyp otyr.
Sondaı-aq 2026 jylǵy 1 mamyr men 31 shilde aralyǵynda Belarýsta jan basyna shaqqandaǵy jáne negizgi áleýmettik-demografııalyq toptar boıynsha kúnkóris mınımýmy bıýdjetiniń (BPM) jańa mólsherleri qoldanysqa engizildi.
Jan basyna shaqqandaǵy BPM 509,62 rýbl deńgeıinde belgilendi, bul aldyńǵy kórsetkishten 2,5%-ǵa joǵary.
Eńbekke qabiletti halyq úshin BPM 554,4 rýbldi, zeınetkerler úshin – 366,59 rýbldi quraıdy. Al 3 jasqa deıingi balalar úshin – 314,1 rýbl, 3 pen 6 jas aralyǵyndaǵylar úshin – 422,66 rýbl, 6 jastan 18 jasqa deıingi balalar úshin – 497,59 rýbl deńgeıinde belgilengen.
Bul – 2026 jyly BPM kóleminiń ekinshi ret qaıta eseptelýi.
Eske sala ketsek, osy aıda elimizde 5,8 mln qyzmetkerge jumys berýshiniń qosymsha zeınetaqy tólemderi tólengenin jazdyq.
Al Eńbek jáne halyqty áleýmettik qorǵaý mınıstri Asqarbek Ertaev bıyl zeınetaqy qaıta kóterilmeıtinin málimdedi.
