Belarýste soǵys ardagerlerine qansha qarajat beriledi
ASTANA. KAZINFORM — Belarýste ekinshi dúnıejúzilik soǵys ardagerleri men zardap shekkenderge kórsetiletin memlekettik qoldaý sharalary jarııalandy. Bul týraly BELTA Eńbek jáne áleýmettik qorǵaý mınıstrligine silteme jasap habarlady.
Birjolǵy materıaldyq kómek 4–8 mamyr aralyǵynda tólenedi: Ekinshi dúnıejúzilik soǵystyń qatysýshylary men soǵys saldarynan múgedek bolyp qalǵan azamattarǵa — 5 myń rýbl, ózge sanattaǵy ardagerlerge — 2,5 myń rýbl, soǵys saldarynan zardap shekkenderge — 1,5 myń rýbl beriledi.
— Kútimdi qajet etetin barlyq ardager men soǵys zardaptaryn kórgen azamattar ártúrli kómek túrlerimen qamtylǵan. Atap aıtqanda, 70-ten astam adam áleýmettik pansıonattar men aýrýhanalarda kómek alady, shamamen 1,4 myń adamǵa úıde áleýmettik qyzmet kórsetiledi. Sonymen qatar, 180-nen astam adamǵa týystary qarap otyr, sol úshin olarǵa járdemaqy tólenedi, — dep habarlady vedomstvo.
Sondaı-aq, 1 sáýirge deıin barlyq ardager men soǵys saldarynan zardap shekkenderdiń turǵyn úı jaǵdaılary tolyq tekserilgen. Turǵyn úıler jóndelip, pesh jáne gaz jabdyqtary tekserilip, jóndeýden ótken, sondaı-aq avtonomdy órt dabyldary ornatylǵan.
— Jeńis kúni qarsańynda Belarýs ardagerler men soǵys saldarynan zardap shekkenderge erekshe kóńil bóledi. Memleket pen qoǵam olardyń erligine qurmet bildirip, laıyqty ómir súrýine jaǵdaı jasaý úshin kúsh biriktiredi, — dep atap ótti mınıstrlik.
1 sáýirdegi derek boıynsha elde 574 ardager turady. Onyń ishinde 269-y — soǵysqa qatysýshylar men múgedekter, 146-sy — tyl eńbekkerleri, 156-sy — Lenıngrad blokadasyn bastan ótkergender.
Sonymen qatar shamamen 5,5 myń azamat soǵys saldarynan zardap shekkender sanatyna jatady. Olardyń basym bóligi — burynǵy fashıstik kontslagerlerdiń, túrmelerdiń jáne ózge de kúshtep ustaý oryndarynyń tutqyndary.
Osyǵan deıin Ózbekstanda II Dúnıejúzilik soǵys ardagerlerine 30 mln sým beriletini habarlandy.
Al Qyrǵyzstanda Ekinshi dúnıejúzilik soǵys ardagerlerine 200 myń som kóleminde birjolǵy tólem taǵaıyndalady.