Belarýste ShYU-ǵa qatysýshy elderdiń mádenıet mınıstrleriniń alǵashqy kezdesýi ótti
ASTANA. KAZINFORM – Shanhaı yntymaqtastyq uıymyna qatysýshy elderdiń mádenıet mınıstrleriniń alǵashqy kezdesýi "Vıtebskidegi slavıan bazary" XXXIII halyqaralyq óner festıvali aıasynda bastaldy, dep habarlaıdy BELTA.
Kezdesýge Belarýs, Reseı, Ázerbaıjan, Ózbekstan, Tájikstan, Pákistan, Qyrǵyzstan, QHR, Qazaqstan, Iran jáne Úndistan ókilderi qatysýda. Vıtebskige sondaı-aq ShYU Bas hatshysy Chjan Mın keldi.
Belarýs Mádenıet mınıstri Anatolıı Markevıch buǵan deıin tilshilerge osy kezdesýden kútiletin praktıkalyq qorytyndy týraly aıtqan bolatyn. Onyń atap ótýinshe, munda bir jáne eń basty másele — mádenıetter arasyndaǵy dıalog talqylanady.
«Biz keıinnen Belarýsten biz úshin „Dástúrler arqyly — bolashaqqa“ atty óte mańyzdy halyqaralyq jastar forýmyn ótkizý týraly bastama kóterýge nıetti bolǵandyqtan otyrysqa qatysýshylardyń barlyǵynyń pikirin tyńdaǵymyz keledi. Sondyqtan osy taqyrypty talqylap, búgingi tańda ár elde bar jol kartalarynda, birlesken jumysta qanshalyqty jetistikke jetkenimizdi kórgimiz keledi. Men múmkin biz ońaı túgendeý júrgizip, júrip ótken joldy qarastyrýymyz kerek shyǵar dep usynamyn. Jáne bolashaqta óte mańyzdy jobalarymyzdy belgileımiz», — dedi mınıstr.
Qazaqstandy QR Mádenıet jáne aqparat vıtse-mınıstri Evgenıı Kochetov tanystyrdy. Ol ózara mádenı baılanystyń mańyzdylyǵyn atap ótti.
«Mádenı dıalogty saqtaý jáne damytý bizdiń memleketter dıplomatııasynyń negizine aınalyp, shıelenisterdi sheshýge jáne ózara múddelerdi jaqyndastyrýǵa yqpal etip jatyr», – dep atap ótti Evgenıı Kochetov.
ShYU-ǵa qatysýshy memleketterdiń mádenıet mınıstrleriniń kezdesýi Vıtebskide alǵash ret ótip otyr jáne Belarýs úshin erekshe mańyzǵa ıe. Belarýs shilde aıynyń basynda Shanhaı yntymaqtastyq uıymynyń múshesi boldy, tıisti sheshimge Astanada ShYU-ǵa múshe memleketter basshylary keńesiniń otyrysy barysynda qol qoıyldy.
Aıta keteıik, buǵan deıin Aleksandr Lýkashenko Astanaǵa ShYU sammıtine qatysý úshin kelgen bolatyn. Ol agenttik tilshisine eksklıýzıvti suhbat berdi.
«Búgingi tańda Uıymnyń erkin saýda-ekonomıkalyq aımaǵyn qurý ıdeıasy alǵa tartylyp jatqan ShYU-nyń Damý qoryn qurý jobasy jasaqtalyp jatyr. Budan da mańyzdysy — Uıym aty atalǵanda tek qana qaýipsizdik jáne ekonomıkalyq máselelerdiń oıǵa kelmeýi. Óıtkeni, bul mádenıetterdi ózara baıytý, halyqtarymyzdy jaqyndastyrý, jastar uıymdarynyń tikeleı baılanysýy, sport, týrızm, ǵylym, bilim salalaryndaǵy ózara is-qımyldy jandandyrýdyń biregeı múmkindigi de ǵoı. Mine, sondyqtan da Belarýs 9-15 shilde aralyǵynda ótetin jyl saıynǵy „Vıtebsktegi slavıan bazary“ halyqaralyq festıvaliniń baǵdarlamasyna ShYU elderiniń ulttyq mádenıetteri kúnin engizdi», — dedi Belarýs prezıdenti.
