Belarýste reseılik áleýmettik jelige kirý buǵattaldy

ASTANA. KAZINFORM – Belarýste reseılik «VKontakte» áleýmettik jelisiniń desktop-nusqasyna qoljetimdilik shekteldi. Bul týraly 24 qazan kúni keshke BelGIE – elektr baılanysyn baqylaý jónindegi memlekettik ınspektsııa deregine silteme jasap jergilikti BAQ habarlady, dep jazady DW.

BelGIE saıtynda kórsetilgendeı, áleýmettik jelige qoljetimdilik Belarýs memlekettik qaýipsizdik komıtetiniń (KGB) usynýy negizinde shektelgen. Buǵattaý merzimi naqty kórsetilmegen.

Bul – elde reseılik eń iri áleýmettik jelige qoljetimdilikti shekteýdiń alǵashqy jaǵdaıy. Keıbir paıdalanýshylar saıttyń ashylmaı qalǵanyn habarlasa, mobıldi qosymsha jumysyn jalǵastyryp tur. «VKontakte» jelisi eldiń eń iri baılanys operatory «Beltelekom» jelisinde buǵattalǵan.

Resmı túsiniktemeler ázirge jarııalanǵan joq. Degenmen memlekettik aqparat agenttigi - BelTA bul aqparatty rastap, vk.com saıtynyń desktop-nusqasyna ǵana shekteý qoıylǵanyn, al mobıldi qosymshanyń qalypty jumys istep turǵanyn habarlady.

«Nasha Niva» basylymynyń málimetinshe, Telegram-arnalarda pikirler ártúrli. Keıbir derekkózder «VKontakte» tehnıkalyq aqaýǵa baılanysty buǵattalǵanyn, jaǵdaıdyń jaqyn arada qalpyna keltiriletinin jazǵan.

Sonymen qatar, qaýipsizdik qyzmeti áleýmettik jelilerdegi keıbir paraqshalardy «ekstremıstik tizimge» jıi engizip otyratyny atap ótilgen. Olardyń qatarynda táýelsiz BAQ arnalary da bar.

Aıta keteıik, Tájikstan balalarǵa 14 jasqa deıin áleýmettik jelini paıdalanýǵa tyıym salmaq.