Belarýste 52 tutqyn bosatylyp, Lıtvaǵa jiberildi

ASTANA. KAZINFORM — Belarýs bıligi 52 tutqyndy bosatty, olardyń barlyǵy qazirgi tańda Lıtva aýmaǵynda. Bul týraly Lıtva prezıdenti Gıtanas Naýseda habarlady, dep jazady Euronews.com.

Jedel ótkizilgen baspasóz máslıhatynda Naýseda Lıtva syrtqy ister mınıstri Kıastýtıs Býdrıs bosatylǵandardy shekarada qabyldaǵanyn rastady.

Belarýs prezıdenti baspasóz qyzmetiniń málimetinshe, shetel azamattarynyń arasynda alty lıtvalyq bar. Qalǵandary Frantsııa, Germanııa, Polsha jáne Ulybrıtanııa azamattary.

Bul qadam AQSh prezıdenti Donald Tramptyń Belarýs basshysy Aleksandr Lýkashenkomen sóılesip, tutqyndardy bosatýǵa shaqyrǵanynan bir aı ótken soń jasaldy.

Áleýmettik jelidegi málimdemesinde Naýseda Trampqa alǵys aıtyp, 52 adamnyń bostandyqqa shyǵýyn «óte úlken qadam» dep baǵalady. Ol bosatylǵandardyń «tikenekti sym, torlanǵan terezeler men úzdiksiz qorqynyshty artta qaldyrǵanyn» atap ótti.

«Alaıda Belarýs túrmelerinde áli de myńnan astam saıası tutqyn otyr. Biz olardyń barlyǵy erkindikke shyqqansha toqtamaımyz», — dedi Lıtva prezıdenti.

2024 jyldyń shildesinen beri Belarýs bıligi 300-ge jýyq adamdy túrmeden bosatty.

Aıta keteıik, Polsha Belarýspen shekarasyn jabady.