Belarýs tramvaılary Pavlodarǵa ne sebepti jetkizilmedi

PAVLODAR. KAZINFORM — Avtonomdy vagondar byltyr Pavlodardaǵy «Dostyq» shaǵynaýdanynda salynatyn tramvaı tarmaǵy úshin satyp alynýy tıis bolǵan. Alaıda jańadan paıda bolǵan sanktsııa paketterine baılanysty tramvaılar jetkizilmedi.

Pavlodarda tramvaı vagondary kezeń-kezeńimen jańartylyp, tıisti qarjylandyrýmen qamtamasyz etilgen jaǵdaıda «Dostyq» shaǵynaýdanyna tramvaı jelisin uzartý kózdelgen.

«Dostyqqa» tramvaı jelilerin salý jobasy memlekettik saraptamanyń oń qorytyndysyna ıe bolǵan. Barlyǵy jónimen bolsa, jobany bıyl iske asyrý kózdelgen. Aldyn ala esep boıynsha shaǵynaýdandaǵy boljamdy jolaýshylar aǵyny kúnine 5000 adam.

Byltyr Eýropalyq qaıta qurý jáne damý banki (EQQDB) arqyly nesıe usyný esebinen akkýmýlıatorlyq batareıalarmen júretin ári energııa qýatyn barynsha únemdeıtin 25 jańa tramvaı satyp alý josparlanyp, tender jarııalanǵan. Jobanyń jalpy quny — 8 mlrd teńge. Konkýrs nátıjesinde Belarýs Respýblıkasynyń óndirýshisi jeńimpaz atandy.

— 2025 jylǵy 23 qazanda Belarýs Respýblıkasyna aıtarlyqtaı áser etken sanktsııalar paketi bekitildi. Onyń saldarynan banktiń korrespondent-bankpen problemalary týyndady. Osylaısha, tramvaılardy EQQDB arqyly satyp alý múmkin bolmady, — deıdi Pavlodar qalasy turǵyn úı-kommýnaldyq sharýashylyq bólimi basshysynyń orynbasary Arslan Maqsutov.

Osylaısha Pavlodar bıligine belarýstik kompanııamen jasalǵaly turǵan kelisimshartty úzýge týra kelgen. Odan soń jańa vagondardy satyp alýǵa bıýdjetten 4 mlrd teńgege jýyq qarajat bólingen.

Endi memlekettik satyp alýlardy qańtar aıynyń sońyna deıin jarııalamaq nıette.

Buǵan deıin Pavlodarda kúndelikti qatynaıtyn tramvaı kólikteriniń 73%-y tozyp turǵanyn jazǵanbyz.