Belarýste sheteldikterdiń vızasyz júrý merzimi uzartyldy

MINSK. QazAqparat - Belarýste sheteldik azamattardyń vızasyz bolý merzimi 30 táýlikke deıin uzartyldy. Mundaı jarlyqqa Belarýs prezıdenti Aleksandr Lýkashenko 24 shilde kúni qol qoıdy, dep habarlaıdy BELTA memleket basshynyń baspasóz qyzmetine silteme jasap. 

Qabyldanǵan qujatta Belarýs eli ózara vızany alyp tastaý týraly ekijaqty kelisim jasaǵan elderdiń azamattary vızasyz júrýge quqyly memleketterdiń tizimi kórsetilgen.

Belarýsqa vızasyz kelý úshin sheteldik azamattardyń qoldanystaǵy tólqujattary, aqshalary, 10 myń eýro somasynda Belarýstaǵy medıtsınalyq saqtandyrý polısteri bolýy tıis.

Vetnam, Gaıtı, Gambııa, Úndistan, Lıvan, Namıbııa jáne Samoa azamattarynyń tólqujattarynda EO nemese Shengen aımaǵy memleketteriniń aýmaǵyna kirý belgisi bar kóp mártelik vızanyń tólqujatta bolýy, sondaı-aq Mınskige kelgen kúnnen bastap 30 kúnniń ishinde Ulttyq áýejaıdan ushýdy rastaıtyn áýe bıletteri talap etiledi. Qytaı azamattary úshin bul rejım 2018 jyldyń 10 tamyzyna deıin - ózara vızasyz rejım  týraly ekijaqty kelisim kúshine engenge deıin qoldanylady.

Áýejaı arqyly vızasyz júrý tártibi Belarýske Reseıden kelgen,  sondaı-aq reseılik áýejaılarǵa ushýdy josparlap otyrǵan adamdarǵa qoldanylmaıdy. Óıtkeni bul reıster ishkim bolyp tabylady, sondyqtan shekara baqylaýy júzege asyrylmaıdy.

Sondaı-aq, Belarýske jumys isteý, bıznes jasaý jáne oqý maqsatynda 30 kúnnen kóp merzimge keletin sheteldikter úshin vızasyz rejım qoldanylmaıdy.

Belarýske bes jumys kúninen kóp merzimge kelýdi josparlaıtyn sheteldik azamattar ishki ister organdaryna tirkelýi tıis. Qujat resmı jarııalanǵannan keıin kúshine enedi.