Belarýste Roza Rymbaevanyń juldyzy paıda boldy
ASTANA. QazAqparat - Belarýstiń Vıtebsk qalasyndaǵy «Juldyzdar alańynda» qazaqstandyq tanymal ánshi Roza Rymbaevanyń juldyzy ornatyldy, dep habarlaıdy «QazAqparat» HAA tilshisi.
Bul týraly ánshiniń ózi Instagramdaǵy paraqshasynda málimdedi.
Ánshi osy kúnderi Belarýste ótip jatqan «Slavıan bazary» óner festıvaliniń uıymdastyrýshylaryna jáne el prezıdenti Aleksandr Lýkashenkoǵa alǵys bildirdi.
Eske sala keteıik, «Vıtebskidegi Slavıan bazarynyń» «Shekarasyz festıvali» 11 shildeni Qazaqstannyń óner sheberlerine arnaǵan bolatyn. Onda «Uly dala óneri» gala-kontserti qoıyldy, jergilikti kórermender Roza Rymbaeva, Naǵıma Esqalıeva syndy óner ıelerimen qaıta qaýyshyp, Álisher Karımov, Dımash Qudaıbergen sekildi jas talant ıeleriniń ónerinen sýsyndady.
Kınobaǵdarlama aıasynda rejısser Aqan Sataev pen prodıýser Álııa Nazarbaevanyń «Anaǵa aparar jol» tarıhı dramasy qoıyldy.
