Belarýste «qara» rıeltorlar ólim jazasyna kesildi
ASTANA. QazAqparat - Belarýs eliniń Mogılevskıı oblystyq soty búgin alty adamdy óltirgen jáne taǵy úsh adamdy óltirýge daıyndalǵan qara rıeltorlardyń isi boıynsha úkim shyǵardy, dep habarlady BELTA.
Bul atyshýly is boıynsha sot talqylaýy segiz aıǵa sozyldy. Olardyń árqaısysyna Qylmystyq kodekstiń birneshe baptary boıynsha aıyp taǵyldy. Olardyń ishinde alty adamdy óltirip, taǵy úsh adamdy óltirýge daıyndalý, adam urlaý, urlaýǵa daıyndalý, sondaı-aq alaıaqtyq, qaraqshylyq, bopsalaý, zańsyz kásipkerlik qyzmet bar.
Mán-jaıdy jan-jaqty, tolyqtaı, obektıvti zerttegennen keıin bas fıgýrant Igor Gershankov pen onyń sybaılasy Semen Berejnoı eń aýyr jaza - ólim jazasyna kesildi. Onyń jubaıy Tatıanaǵa sot jalpy rejimdegi kolonııada jazasyn óteýmen 24 jylǵa bas bostandyǵynan aıyrý, Borıs Kolesnıkovke - qatań rejimdegi kolonııada 22 jylǵa bas bostandyǵynan aıyrý jazasy taǵaıyndaldy.
Qylmys 2009-2015 jyl aralyǵynda jasalǵan. Olar jalǵyz azamattar men ishimdikke salynǵandardy tańdaǵan. Olardyń materıaldyq jaǵdaılarynyń aýyr ekendigin paıdalanǵan aıyptalýshylar olardy páterlerin satýǵa kóndirip, ornyna jańa úı satyp alýǵa kómektesýge ýáde bergen. Mámileden keıin klıentterdi óltirip, aldyn ala qazylǵan jerge kómip otyrǵan.
