Belarýs Syrtqy ister mınıstrligi Q.Bakıevti Qyrǵyzstan ókimet oryndaryna qaıtarýdy sozyp otyr
ASTANA. Mamyrdyń 13-i. QazAqparat - Belarýs Respýblıkasynyń syrtqy ister mınıstrligi Qyrǵyzstannyń eks-prezıdenti Qurmanbek Bakıevti respýblıkanyń jańa bıligine tapsyrýdy keshiktirip otyr. Vedomstvonyń habarlaýynsha, osy taqyryp tóńireginde «zańnamalyq qıyndyqtar» týyp otyr, dep habarlaıdy RBK agenttigi.
«Bul baısaldy zańdyq amaldardy qajet etetin zańdyq turǵydaǵy úderis», - dedi RBK-ǵa Belarýs Syrtqy ister mınıstrliginiń ókili.
Esterińizge sala keteıik, Qyrǵyzstannyń Bas prokýratýrasy Belarýsqa eldiń burynǵy prezıdenti Qurmanbek Bakıevti ekstradatsııalaý týraly suraý salǵan. Bul týraly Qyrǵyzstan ýaqytsha úkimeti tóraǵasynyń orynbasary Ázimbek Beknazarov habarlaǵan bolatyn.
Q.Bakıevke 2010 jylǵy sáýirdiń 7-sinde bolǵan oqıǵada qaza tapqan adamdardyń ólimine kináli degen syrttaı aıyp taǵylyp otyr. Osy oraıda Belarýstan saıası baspana alǵan Qurmanbek Bakıev otanyna qaıtyp barmaıtyndyǵyn aıtqan. Onyń aıtýynsha, ol Qyrǵyzstannyń prezıdenti jáne konstıtýtsııa kepili bolyp qala beredi.
Budan buryn Á.Beknazarov Belarýstyń qylmyskerlerdi ekstradatsııalaý týraly Mınsk kelisimin buzýǵa quqyǵy joq dep máilmdegen bolatyn. Q.Bakıevti ekstradatsııalaý týraly dekret Qyrǵyzstanda sáýirdiń 27-i kúni qabyldanǵan jáne úkimet basshysy Roza Otynbaevanyń qoly qoıylǵan.
Al Belarýs Respýblıkasynyń prezıdenti Aleksandr Lýkashenko Q.Bakıevti Qyrǵyzstannyń jańa bıligine tapsyrmaıtyndyǵyn málimdegen. Onyń aıtýynsha, ekstradatsııalaýǵa shaqyrý eldiń ýaqytsha úkimeti úshin «nátıjesiz jáne kemsitý». «Qyrǵyzstannyń prezıdenti Belarýs memleketi pen onyń prezıdentiniń qamqorlyǵynda», - dedi A.Lýkashenko.
