Belarýs SІM Túrkııada dıplomattyń jaraqat alýyna qatysty túsinik berdi
ANKARA-NUR-SULTAN. QazAqparat – Belarýs syrtqy ister mınıstri Vladımır Makeı eldiń Túrkııadaǵy Elshiligi qyzmetkeriniń jaralanýyna qatysty pikir bildirdi, dep habarlaıdy «QazAqparat» HAA Anadoly agenttigine silteme jasap.
Oqys oqıǵaǵa oq atqan adamnyń aýlada oınap júrgen balalardyń áreketine narazylyǵy sebepshi bolýy múmkin. Belarýs bas dıplomatynyń málimdemesi osyndaı.
Eske sala keteıik, 24 shilde kúni keshkisin Túrkııadaǵy Belarýs elshiliginiń keńesshine úıine qaıtyp kele jatqan kezde belgisiz bireý oq atqan. Dıplomat balasymen birge bolǵan, ol zardap shekken joq. Shabýyldy buryn áskerı qyzmetshi bolǵan psıhıkalyq aýytqýy bar adam jasaǵan. Qylmysker shabýyl jasaǵannan keıin óz-ózine qol jumsaǵan.
«Qazir egjeı-tegjeıli tekseris júrip jatyr. Bizdińshe, munyń eshbir saıası astary joq. Aýlada oınap júrgen balalardyń áreketine narazy bolǵan adam ashýǵa boı aldyrǵan bolý kerek», - deıdi Makeı.
Onyń aıtýynsha, áli tas túıin qorytyndy aıtýǵa erterek. Mınıstr, sonymen qatar shuǵyl kómek kórsetkeni úshin Túrkııa tarapyna alǵys bildirdi.
Aıta keteıik, Belarýstyń Túrkııadaǵy elshisi Andreı Savınyh jaralanǵan dıplomat esin jıǵanyn málimdedi.
