Belarýs shildede ótetin sammıtte ShYU-nyń tolyqqandy múshesi bolady
ASTANA. KAZINFORM – Uıymnyń shilde aıynda Astanada ótetin aldaǵy sammıtinde Belarýs ShYU-nyń tolyqqandy múshesi bolady. Bul týraly Belta aqparat agenttigi jazdy.
Bul týraly ShYU Bas hatshysy Chjan Mın Tashkentte ótken Shanhaı yntymaqtastyq uıymynyń «Jańa jaǵdaıdaǵy ShYU róli: jalpyǵa birdeı qaýipsizdik, turaqtylyq jáne órkendeý jolyndaǵy kúsh-jigerdi biriktirý» forýmynda aıtty.
Chjan Mın úlken otbasy músheleriniń sany artyp kele jatqanyn atap ótti.
«Kelesi aıda Astanada ótetin sammıtte Belarýstiń ShYU-ǵa qosylýy týraly sheshim qabyldanady, osylaısha múshe memleketterdiń sany tarıhı eki tańbaly serpiliske jetedi», - dedi ol.
ShYU Bas hatshysy sondaı-aq «20 jyldan astam damý barysynda qurylym memleket basshylary kezdesýleriniń óńirlik tetiginen eń aýqymdy, tegis qamtı alatyn halyqaralyq uıymǵa aınalýy» faktisine nazar aýdardy.
Uıym aıasyndaǵy yntymaqtastyqtyń perspektıvaly baǵyttary týraly aıta otyryp, Chjan Mın ShYU saıasat, dıplomatııa, beıbitshilik, damý, qaýipsizdik sııaqty «joǵary deńgeıdegi» mindetterge ǵana emes, sonymen qatar týrızm, sport, qaldyqtardy kádege jaratý sııaqty «halyqqa jaqyn» taqyryptarǵa da nazar aýdaratynyn atap ótti.
«Joǵaryda atalǵan jetistikter Shanhaı rýhynyń ortaq múddelerge, uıymnyń qaýipsizdik pen turaqtylyqty saqtaý, turaqty damýdy qamtamasyz etý jónindegi bastapqy maqsatyna sáıkes keletininiń senimdi dáleli jáne ShYU yntymaqtastyǵy odan ári nyǵaıa túsedi», - dep sanaıdy ol.
5 maýsymda Tashkentte Shanhaı yntymaqtastyq uıymy forýmynyń 19-shy otyrysy ótip jatyr. Sharany ózbek tarapynyń tóraǵalyǵymen Ózbekstan Respýblıkasy Prezıdenti janyndaǵy Strategııalyq jáne óńiraralyq zertteýler ınstıtýty uıymdastyryp otyr. Onyń jumysyna 10 elden 40-tan astam sarapshy, onyń ishinde ShYU-ǵa múshe memleketterdiń ulttyq ǵylymı ortalyqtarynyń ókildik delegatsııasy, baqylaýshy memleketterdiń mamandary jáne dıalog boıynsha seriktester, sondaı-aq ShYU Hatshylyǵy men ShYU Aımaqtyq lańkestikke qarsy qurylymy Atqarýshy komıtetiniń basshylyǵy qatysady.
