Belarýs, Reseı jáne Qazaqstan elderi keden organdarynyń biryńǵaı aqparattyq júıesin qurmaq
STANA. Mamyrdyń 20-sy. QazAqparat - Belarýs, Reseı jáne Qazaqstan elderi keden organdarynyń avtomattandyrylǵan biryńǵaı aqparattyq júıesin qurýdy josparlap otyr.
Bul týraly jýrnalısterge Belarýs Respýblıkasy Baılanys jáne aqparattandyrý mınıstriniń orynbasary Nıkolaı Strýkov Qazaqstan Premer-Mınıstri Kárim Másimovtiń Mınskidegi Joǵary tehnologııalar parkine kelerdiń aldynda málim etti, dep habarlady BELTA agenttigi.
«Bizdiń elimizde búginde ondaı júıe jumys isteıdi, biz ony reseılik jáne qazaqstandyq tarappen yqpaldastyrýǵa nıettimiz», dedi N.Strýkov.
Keden odaǵy aıasyndaǵy úsh eldiń yntymaqtastyǵyna toqtalǵan N.Strýkov, sondaı-aq Belarýs, Reseı jáne Qazaqstannyń biryńǵaı júıesin qurý úshin atalǵan elder óz ulttyq zańnamalaryn úılestirýi qajet ekenin aıtty. «Eger baǵyt-baǵdar da, reglament pen is-qımyl qaǵıdalary da biryńǵaı bolsa, onda bizdiń baǵdarlamashylarymyzdyń avtomattandyrý jáne bir-birimizdi habardar etý salasyndaǵy zamanaýı tehnologııalardy tez ıgerýlerine múmkindikteri bar», - dep sanaıdy ol.
Nıkolaı Strýkov sonymen birge, belarýs delegatsııasynyń Qazaqstannyń elektrondyq úkimet salasyndaǵy tájirıbesin zerttegenin eske saldy. «Endi biz óz ınnovatsııalarymyzdy, onyń ishinde «Elektrondy Belarýs» baǵdarlamasy aıasyndaǵy jobalardy, «Bir tereze» júıesin, memlekettik organdardaǵy qujattar aınalymynyń elektrondyq júıesin tanystyrǵymyz keledi», deıdi ol.
Belarýs tarapy sondaı-aq Qazaqstannyń aqparattyq kıoskiler qurý jónindegi tájirıbesine yqylas tanytýda.
