Belarýs Prezıdenti Mınskidegi lańkestik áreketke jaýaptylardy tezirik tabýdy tapsyrdy
SK. 12 sáýir. QazAqparat /Aıtýar Mamlın/ - Mınsk metrosynda bolǵan jarylysqa baılanysty Belarýs Prezıdenti keshe túnde, oqıǵa ornynda bolyp kelgennen keıin shuǵyl keńes ótkizdi.
Bul týraly Belarýs memleketi basshysynyń baspasóz qyzmetinen habarlady.
«Árbir zardap shegýshige dereý kómek kórsetilýi kerek. Tergeýdiń nátıjeleri kún saıyn shyǵarylýy, adamdarǵa tolyqqandy aqparat berýimiz kerek. Bizge qaýiptiń qara bulty tónip tur. Bizdiń elimizdiń turaqtylyǵyn buzý bireýlerge tıimdi. Tynysh ómir endi bizge joq. Osyǵan barabar jaýap tabylýy kerek. Jaýaptylardy tezirik tabýlaryńyzdy suraımyn», - dep málim etti A.Lýkashenko.
QazAqparat buǵan deıin habarlaǵandaı, keshe, 11 sáýir kúni jergilikti ýaqyt boıynsha 17.55-te Mınskidegi «Oktıabrskaıa» metropolıten stansasynda jarylys boldy. Bomba adamdar kóp júretin kezde jáne Mınsk metropolıtenindegi jolaýshylar aýysyp otyratyn jalǵyz bekette - «Oktıabrskaıa» jáne «Kýpalovskaıa» stansalarynda eki poıyz turǵan kezde jarylǵan.
Kýágerlerdiń aıtýynsha, platformada aldymen qatty tars etken dybys estilgen, odan keıin qara tútin shyqqan, oqıǵa ornyna dereý órt sóndirýshiler, 30 shaqty jedel járdem kóligi, mılıtsııa qyzmtkerleri jetken.
Jarylys saldarynan 11 adam qaza bolǵan, 100-den astam adam jaralanǵan Aýyr jaraqat alǵandar da bar.
