Belarýs Prezıdenti JI qandaı salalarda qoldanylatynyn málimdedi
ASTANA. KAZINFORM — Algorıtmderdiń aýyl sharýashylyǵy, óndiris, t.b. sektorlarǵa tıgizer septigi orasan. Bul jóninde V Eýrazııa ekonomıkalyq forýmynda Belarýs Prezıdenti Aleksandr Lýkashenko málimdedi.
– Jasandy ıntellekt mashına qurastyrý, metall óńdeý tárizdi salalarda óndiristiń bir bóligine aınalyp keledi. «Kompıýterlik kóz» ónimnen aqaý shyǵý faktilerin aıtarlyqtaı azaıtady. Robototehnıkalyq keshenderdiń sút óndirisinde de tıimdiligi zor. Sebebi, bir keshen tórtten jıyrmaǵa deıingi jumysshyny almastyra alady, – dedi ol.
Sonymen birge, Belarýs Prezıdenti aqyldy júıeler daıyn ónimdi jetkizý merzimin 17%-ǵa qysqartatynyn atap ótti. Bul taýardyń sapasyn saqtaýǵa áser etedi.
Odan bólek, Aleksandr Lýkashenko jańa tehnologııalar Belarýstegi Mınsk traktor zaýyty, «Gomselmash», «BelAZ» tárizdi kásiporyndarǵa engizilgenin málimdedi.
Ol jasandy ıntellektiniń basqa da sektorlarǵa paıdasyna toqtaldy.
– Ken oryndarynda mundaı júıeler jumysty 20%-ǵa ónimdirek qylady. Al egin alqaptaryndaǵy shyǵyndy 25%-ǵa tómendetedi. Egin sharýashylyǵynda jasandy ıntellektini Jer serigi túsirgen sýretter men alqaptardaǵy datchıkter kórsetkishin taldaýǵa qoldanyp jatyrmyz. Bul tyńaıtqysh sebý, sýarý, tuqymdy qorǵaý sekildi jumystardy dál ári durys atqarýǵa kómektesedi. Nátıjesinde, ónim kólemi kóbeıedi, – dedi Belarýs Prezıdenti.
Sonymen qatar, Belarýste JI medıtsına, farmatsevtıka, kólik, logıstıka, saýda, memlekettik basqarý t.b. salalarda qoldanylatynyn aıtty.
Eske salaıyq, buǵan deıin atalǵan forýmda Qazaqstan Prezıdenti EAEO-nyń áleýetin nyǵaıtýdyń strategııalyq mańyzdy mindeti turǵany jóninde málimdeme jasaǵan edi.
