Belarýs prezıdenti túrli eldiń 123 azamatyna raqymshylyq jasady

ASTANA. KAZINFORM — Belarýs prezıdenti Aleksandr Lýkashenko AQSh prezıdenti Donald Tramppen qol jetkizilgen kelisimder aıasynda jáne onyń ótinishi boıynsha túrli elderdiń 123 azamatyna raqymshylyq jarııalady. Bul týraly BELTA habarlady.

— AQSh prezıdenti Donald Tramppen qol jetkizilgen kelisimder aıasynda jáne onyń ótinishi boıynsha, AQSh-tyń burynǵy prezıdenti Djo Baıden ákimshiligi engizgen Belarýs Respýblıkasynyń kalıı salasyna qarsy zańsyz sanktsııalardyń kúshin joıýyna, sondaı-aq Belarýs Respýblıkasyna qatysty basqa da zańsyz sanktsııalardy alyp tastaý protsesiniń praktıkalyq kezeńge ótýine baılanysty, memleket basshysy Belarýs Respýblıkasynyń zańdaryna sáıkes tyńshylyq, terrorızm jáne ekstremıstik sıpattaǵy qylmystar úshin sottalǵan túrli eldiń 123 azamatyna keshirim jasaý týraly sheshim qabyldady, — dep málimdedi prezıdenttiń baspasóz qyzmeti.

Atalǵan qadam sondaı-aq basqa memleket basshylarynyń ótinishteri, gýmanıtarlyq qaǵıdattar, jalpyadamzattyq jáne otbasylyq qundylyqtardy basshylyqqa ala otyryp jasalǵan. Bul sheshim Belarýstiń seriktes eldermen qarym-qatynasynyń oń dınamıkasyn jedeldetýge jáne Eýropa aımaǵyndaǵy jalpy jaǵdaıdy turaqtandyrýǵa baǵyttalǵan.

Sońǵy ýaqytta, onyń ishinde qarasha aıynyń sońynda qabyldanǵan sheshimderdi eskere otyryp, Belarýs prezıdenti keshirim jasaǵan adamdardyń jalpy sany 156 adamǵa jetti.

Keshirilgender arasynda Ulybrıtanııa, AQSh, Lıtva, Ýkraına, Latvııa, Aýstralııa jáne Japonııa azamattary bar.

Budan buryn Belarýs bıligi 52 tutqyndy bosatty, olardyń barlyǵy qazirgi tańda Lıtva aýmaǵynda ekeni aıtyldy.