Belarýs-Polsha shekarasyndaǵy jaǵdaı: Bosqyndar toptarǵa bólindi

MINSK. BELTA-QazAqparat – Belarýs-Polsha shekarasyndaǵy ótkizý beketiniń janyndaǵy lagerdegi bosqyndar kishigirim toptarǵa bólindi. Olar kólik-logıstıkalyq ortalyqqa qaraı jiberildi, dep habarlaıdy QazAqparat Belta agenttigine silteme jasap.

Aıta ketsek, olarǵa Belarýs Prezıdenti Aleksandr Lýkashenkonyń buıryǵymen uıymdastyrylǵan ýaqytsha ornalastyrý beketine ótýge birneshe ret usynys jasalǵan. Kólik-logıstıkalyq ortalyqta olar barlyq kerek zattarmen qamtamasyz etilgen. Bosqyndarǵy jyly kıimder berilgen, tamaqtandyrý uıymdastyrylǵan. Olarǵa bılik organdarymen qosa, qoǵamdyq uıymdar da kómek kórsetýde, táýlik boıy dárigerler kúzetýde.

Belarýs tarapy shekarada qalyp qoıǵan adamdarǵa kómek kórsetý úshin qoldan kelgenin bárin jasap jatqanyn habarlady.

Euronews jazýynsha, Belarýs-Polsha shekarasynda myńdaǵan mıgranttyń jınalǵany Belarýstiń basqa da kórshilerine belgi boldy. Latvııa shyǵystaǵy shekarasyn nyǵaıtyp jatyr: respýblıka bıligi 37 shaqyrym qashyqtyqty quraıtyn ýaqytsha qorshaý salýdy qarjylandyrýda. Qorshaý barlyq jerge ornatylmaýy múmkin, sebebi shekarada ózen men balshyq jerler bar. Rıga resmı túrde kelesi jyldyń aqpanyna deıin shekaradaǵy aımaqqa tótenshe jaǵdaı rejımin sozdyrýǵa ruqsat berdi.

Latvııanyń shekara qyzmetiniń general-leıtenanty ıÝrıs Kýsınsh bylaı dedi: «Biz daýys zoraıtqyshpen kúrd, arab, aǵylshyn jáne orys tilinde Latvııa aýmaǵyna zańsyz kirgender jaýapqa tartylatynyn eskertip jatyrmyz. Kóptegen jaǵdaıda adamdardyń qaıta ketýine osy da jetkilikti shyǵar».

Belarýstiń taǵy bir shekaralas kórshisi - Lıtva mıgranttardy ıtterdiń kómegimen qýyp shyqqandy teriske shyǵardy. Ondaı vıdeony Belarýs Memlekettik shekara komıteti taratty. Lıtva tarapynyń málimetinshe, ol jalǵan aqparat.