Belarýs pen Taıland arasynda tikeleı áýe reısi ashyldy

ASTANA. KAZINFORM — Belarýs Syrtqy ister mınıstrligi Taılandpen tikeleı áýe qatynasy qurylǵany týraly habarlady. Mınskiden Pattaııaǵa alǵashqy reıs oryndalyp úlgerdi, dep habarlaıdy mınıstrliktiń baspasóz qyzmeti.

Ushýdyń ashylý saltanatyna Belarýs Syrtqy ister mınıstriniń birinshi orynbasary Sergeı Lýkashevıch qatysty.

Taılandta 9 qańtar kúni reısti saltanatty qarsy alý rásimi ótti. Oǵan Belarýs Respýblıkasynyń Vetnamdaǵy Tótenshe jáne Ókiletti Elshisi Vladımır Borovıkov, sondaı-aq Belavııa áýe kompanııasynyń resmı ókilderi kýá boldy.

Belarýs Syrtqy ister mınıstrliginiń habarlaýynsha, 11 qańtarda Mınsk-Phýket jańa reısin ashý josparlanyp otyr, bul eki el arasyndaǵy tikeleı ushý múmkindikterin aıtarlyqtaı keńeıtedi.

Eske salaıyq, Air China áýekompanııasy Almaty men Chendý Tıanfý (Qytaı Halyq Respýblıkasy), Sychýan provıntsııasynyń ákimshilik ortalyǵy arasynda tikeleı áýe qatynasyn iske qosty.