Belarýs-Lıtva shekarasy: kúzden beri turǵan myńnan astam júk kóligi qozǵaldy
ASTANA. KAZINFORM – 2025 jyldyń kúzinen beri Belarýs aýmaǵynda turǵan myńnan astam júk kóligi Lıtvaǵa qaıta óte bastady, dep habarlaıdy TASS.
Belarýs Memlekettik keden komıtetiniń tóraǵasy Vladımır Orlovskıı málim etkendeı, 24 naýryzdan bastap shekara arqyly ótkizý qaıta jandanǵannan keıin 1300-ge jýyq júk kóligi Belarýs-Lıtva jáne Belarýs-Polsha baǵyttary arqyly shyqqan.
Taǵy shamamen 100 kólik Lıtvaǵa kirýdi kútip tur. Belarýs aýmaǵynda 500-den astam júk kóligi áli de qalǵan.
Onyń aıtýynsha, lıtvalyq tarap kólikterdi qabyldaýǵa asyǵar emes. Mysaly, Lıtvadaǵy «Mıadınınkaı» ótkizý beketiniń táýliktik ótkizý múmkindigi 500 kólikke deıin jetkenimen, is júzinde kúnine orta eseppen 70-80 júk kóligi ǵana ótedi, keıde bul kórsetkish 140-qa deıin barady.
Saldarynan shekarada kezek saqtalyp otyr. Onyń ishinde Belarýs aýmaǵyndaǵy arnaıy turaqtarda turǵan kólikter de bar.
Orlovskııdiń sózinshe, Lıtva bıligi júk kólikterin qaıtaryp jatqan tasymaldaýshylarǵa aıyppul salýmen qorqytyp, olardy sanktsııalyq talaptardy buzdy dep aıyptaýda.
Eske salsaq, Lıtva men Belarýs arasyndaǵy shekara máseleleri 2025 jyldyń qazan aıynda bastalǵan. Lıtva tarapy Belarýs aýmaǵynan áýe arqyly temeki kontrabandasy tasymaldanýyna baılanysty shekarany japqan. Buǵan jaýap retinde Belarýs lıtvalyq júk kólikteriniń qozǵalysyn shektep, olardy táýligine 120 eýro tólemmen arnaıy turaqtarǵa qoıý talabyn engizgen.
Aıta keteıik, Belarýs pen Taıland arasynda tikeleı áýe reısi ashyldy.
