Belarýs krıptobankterdi zańdastyrdy: alǵashqysy alty aıdan keıin paıda bolýy múmkin

ASTANA. KAZINFORM — 16 qańtarda Aleksandr Lýkashenko krıptobankter úshin jaǵdaı jasaýdy qarastyratyn jarlyqqa qol qoıdy, dep habarlaıdy Belarýs prezıdentiniń baspasóz qyzmeti.

Qujat Belarýstiń qarjylyq IT-tehnologııalarynda kóshbasshy retindegi ımıdjin nyǵaıtýǵa baǵyttalǵan jáne elde krıptobankter qyzmeti úshin jaǵdaı jasaýdy qarastyryp otyr. 

Jarlyqqa sáıkes, krıptobank bolyp qyzmetin bank, tólem jáne olarmen baılanysty basqa da qarjylyq operatsııalardy ótkizýde tsıfrlyq belgilerdi (tokenderdi) paıdalaný quqyǵy berilgen aktsıonerlik qoǵam tanylady. Krıptobankter Ulttyq bankke baǵynatyn bolady.

Buryn dástúrli bankter tek fıat aqshamen, al krıptobırjalar –tek krıptovalıýtamen jumys isteıtin. Jańa krıptobank ınstıtýty osy fýnktsııalardy biriktirýge múmkindik beredi.

— Taǵy bir mańyzdysy — biz krıptovalıýtany krıptobank aıasynda qanda da bir bólek qural retinde qarastyrmaımyz. Bul banktiń óz balansynda kádimgi fıat aqshasymen qatar operatsııa júrgize alatyn tolyqqandy valıýta bolady, ıaǵnı azamattar tek krıptovalıýta shotyna tirkelgen kartalardy shyǵara alatynyn bildiredi. Kásiporyn shotta qalǵan qarajatty qurylymy krıptovalıýta bolatyn shotta saqtaı alady. Osyndaı ınnovatsııa, — dep málimdedi Belarýs Ulttyq banki basqarma tóraǵasynyń birinshi orynbasary Aleksandr Egorov.

Egorovtyń aıtýynsha, krıptobırjalardyń qoljetimdi quraldarynan basqa krıptobank oryndaı alatyn operatsııalar tizimi keńeıtiledi. Buǵan krıptovalıýta kepilge salynatyn nesıe berý sııaqty qyzmetter kiredi.

BELTA habarlaýynsha, Belarýstegi alǵashqy krıptovalıýta banki jarty jyldan keıin paıda bolýy múmkin. 

Buǵan deıin Túrikmenstan maınıng pen krıptovalıýta bırjalarynyń qyzmetin zańdastyrǵanyn jazǵan edik.