Belarýske munaı eksporttaý kelisimine 2020 jyldyń basynda qol qoıylýy múmkin
«Belarýs daıyn munaı ónimderinen buryn ózderi óńdep alatyndaı munaı, gazoıl sekildi shıkizatqa kóbirek qyzyǵyp otyr. Olar osylaısha, shıkizatty óz zaýyttarynda paıdalanyp, daıyn ónimge ıe bolmaq. Sol sebepti, meniń oıymsha, olar bizdiń benzınge qyzyǵyp otyrǵan joq. Kelissózderde jarııalanǵan suranys kólemi shamamen 3,2 mln tonna. Ony tasymaldaýdyń túrli nusqalary qaralý ústinde. Qazir jalpy suraqtar boıynsha ortaq mámilege keldik. Endi memleket ishindegi protsedýralardan ótkennen keıin ózge mınıstrlikterdiń maquldaýyn alýymyz kerek. Ǵylymı-quqyqtyq, ınvestıtsııalyq saraptama jasalýy tıis. Sodan keıin ǵana eksportqa shyǵa alamyz», - dedi Áset Maǵaýov búgin Úkimet úıinde ótken baspasóz máslıhatynda.
Vıtse-mınıstr Belarýs tarapymen eksport kólemi boıynsha kelisimge kelgennen keıin ǵana shıkizat qaı baǵyt arqyly tasymaldanatyny talqylanatynyn aıtyp ótti.
«Reseılik áriptesterimizben de sol kezde sóılesemiz. Al Reseı tarapy buǵan qarsy degendi estimeppin. Meniń bilýimshe, Qazaqstan tarapynan da, Belarýs tarapynan da ondaı usynys túspegeni aıtylǵan bolatyn. Barlyq saraptama aıaqtalǵannan keıin Ádilet jáne Syrtqy ister mınıstrlikteriniń ruqsatyn alý qajet. Belarýs tarapy surap otyrǵan eksport kólemin qamtamasyz etý úshin birqatar erejege ózgeris engizý kerek. Belarýs Qazaqstannan ózge elderge de satatyn kólemdegi munaıdy alǵysy keledi. Mundaı kólemdegi munaı úshin kedendik eksport salyǵy alynady. Bul bizdiń bıýdjetke qosymsha shyǵyn. Sondyqtan, biz Belarýs jaǵyna ónimdi taratý kelisimi boıynsha kelissózder júrgizýdi usyndyq. Ózderi suraǵan munaıdy Qazaqstannan kedendik eksport salyǵy salynbaı shyǵarylatyn ónim retinde satyp alsa ǵana biz úshin barynsha shyǵynsyz bolar edi», - dedi ol.
Áset Maǵaýov eger Belarýs tarapymen baǵa men marketıng strategııasy boıynsha kelisimge qol jetkizilse, Qazaqstan atalmysh kólemdegi munaıdy keste boıynsha jetkizýge daıyn ekenin atap ótti.
«Demek, barlyǵy kompanııalarmen kelissóz júrgizý nátıjesine baılanysty. Meniń oıymsha, barlyq protsedýradan sátti ótsek, ıaǵnı qosymsha maquldaýdy qajet etetin basqa memlekettik organdar tarapynan kútpegen eskertýler bolmasa, keler jyldyń basynda kelisimge qol qoıylýy múmkin», - dedi Áset Maǵaýov.
Eske sala ketsek, Qazaqstan Belarýsqa jylyna 1 mıllıonnan 3,5 mıllıon tonnaǵa deıin munaı jáne munaı ónimderin jetkizýdi josparlap otyrǵanyn buǵan deıin Energetıka mınıstri Qanat Bozymbaev aıtqan bolatyn.
