Belarýs halqy «aramtamaqtyq týraly» zańǵa qarsy ereýilder ótkizýde
ASTANA. QazAqparat - Belarýstyń birneshe qalasynda el prezıdentiniń «Áleýmettik masyldyqtyń aldyn alý týraly» dekretine qarsy sanktsııalanbaǵan ereýilder ótti, dep habarlaıdy QazAqparat Lenta.rý-ǵa silteme jasap.
Eń iri aktsııa Gomelada boldy, oǵan bir myńnan úsh myń adamǵa deıin qatysty. Sondaı-aq júzdegen adam Mogılev, Brest jáne Vıtebsk qalalarynyń kóshelerimen júrip ótti.
Narazylyq sharalaryna balalaryn jetektegen otbasylar men zeınetkerler qatysty. Jınalǵan jurttyń qoldarynda oppozıtsııalyq plakattar bolǵan joq deýge bolady, biraq olardyń deni «Men aramtamaq emespin» degen jazýy bar qaǵazdardy ustaı kelgen.
17 aqpan kúni osyndaı aktsııa Belarýs astanasy Mınskide ótti. Oǵan jergilikti oppozıtsııa ókilderi qatysty. Belsendiler dekrettiń kúshin joıýdy, kommýnaldyq qyzmetter baǵasyn tómendetýdi jáne «taza» saılaýlardy qaıtarýdy talap etti.
12 aqpan kúni eskertpe-habarlandyrýlar jiberilgen Belarýstyń 470 myń azamatynyń 46 myńy «aramtamaq» salyǵyn tólegeni belgili boldy. Reseı valıýtasymen eseptegende 431 mln. rýbl jınalǵan.
Dekretke Belarýs prezıdenti Aleksandr Lýkashenko 2015 jyly qol qoıǵan bolatyn. Oǵan sáıkes, eńbekke qabiletti, biraq jumys istemeıtin, sondaı-aq sońǵy alty aı boıy salyq tólemeıtin respýblıka turǵyndary jyl saıyn 250 dollar kóleminde salyq tóleýi tıis. Áıtpegen jaǵdaıda, olar ákimshilik jaýapkershilikke tartylady.
