Belarýs ǵalymdary qaterli isikti emdeýdiń jańa tásilin usyndy
ASTANA. KAZINFORM – Mınskide ótken halyqaralyq konferentsııada tanystyrylǵan CAR-T terapııa tájirıbesi medıtsına mamandary úshin úlken qyzyǵýshylyq týdyryp otyr, dep habarlaıdy BELTA.
Reseı Densaýlyq saqtaý mınıstrligi molekýlalyq medıtsına boıynsha ǵylymı-ádistemelik ortalyǵy zerthanasynyń meńgerýshisi Vladımır Nazarov bul baǵyttaǵy tájirıbe áriptester arasyndaǵy yntymaqtastyqty damytý úshin mańyzdy ekenin aıtty.
– Onkogenetıka jáne molekýlalyq-genetıkalyq zertteýlerdi onkologııada qoldaný – óte ózekti baǵyt. Konferentsııada Belarýs jáne Reseı mamandarynyń baıandamalary usynyldy. Tuqym qýalaıtyn aýrýlardy dıagnostıkalaýda jáne CAR-T terapııasynyń jańa tásilderin engizýde aıtarlyqtaı jetistikter bar, – dedi ol.
Sarapshynyń aıtýynsha, qatty isikterdi emdeýde CAR-T terapııasyn qoldaný tájirıbesi ásirese qyzyǵýshylyq týdyrady. Bul baǵyttaǵy ázirlemeler Sankt-Peterbýrg memlekettik medıtsına ýnıversıteti úshin de mańyzdy.
– Konferentsııada usynylǵan CAR-T terapııa arqyly qatty isikterdi emdeý tájirıbesi bizdiń el úshin óte ózekti, – dep atap ótti Vladımır Nazarov.
Ol sondaı-aq ǵylymı mektepter arasyndaǵy ózara is-qımyldyń mańyzyn atap ótip, TMD elderindegi patsıentterdiń sapaly medıtsınalyq kómek alýyna yqpal etetinin jetkizdi.
Aıta keteıik, bul konferentsııany Belarýs Respýblıkasy Prezıdenti Іs basqarmasyna qarasty Respýblıkalyq klınıkalyq medıtsınalyq ortalyq uıymdastyrǵan. Jıyn molekýlalyq-genetıkalyq tehnologııalardy praktıkalyq medıtsınaǵa engizý jáne aýrýlardyń aldyn alýǵa baǵyttalǵan zamanaýı tásilderdi talqylaýǵa arnaldy.
Eske salaıyq, buǵan deıin onkolog maman qaterli isiktiń aldyn alý joldaryn atady.
