Belarýs ǵalymdary epılepsııany emdeýge arnalǵan dáriniń balamasyn shyǵardy

ASTANA. KAZINFORM — Belarýs ǵalymdary epılepsııa jáne júıke júıesi aýrýlarymen aýyratyn naýqastarǵa arnalǵan ımporttyq dáriniń balamasy — «Gabapentın-NAN» preparatyn ózderiniń ishki naryǵyna shyǵardy. Bul týraly BELTA agenttigi habarlady.

Bul ázirleme memlekettik deńgeıde joǵary baǵalanǵan. Belarýs Ulttyq ǵylym akademııasy «Gabapentın-NAN» preparatyn ótken jyldyń qorytyndysy boıynsha akademııa ǵalymdarynyń irgeli jáne qoldanbaly zertteýler salasyndaǵy úzdik 10 ǵylymı nátıjesiniń qataryna engizdi.

Preparatty ázirleýmen ǵalymdar 4 jyldan astam ýaqyt aınalysqan. Quramy jaǵynan ol túpnusqa dáriniń 100 paıyzdyq analogy sanalady. Al baǵasy boıynsha belarýstik preparat túpnusqadan shamamen 50 paıyzǵa arzan.

«Biz túpnusqa preparatty tolyq qaıtalaǵan jalǵyz kompanııamyz. Tek syrtqy túri, shyǵarý formasy men dozırovkasy ǵana emes, sonymen qatar qospalar profıli de dálme-dál sáıkes keledi», dedi farmatsevtıkalyq kásiporynnyń ǵylymı zertteýler jáne ázirlemeler bóliminiń basshysy Vladıslav Gýdovıch.

Dárilik preparatty naryqqa sátti shyǵarý úshin kóptegen mamandar jumyldyrylǵan. Bar-joǵy birneshe aıdyń ishinde dárihanalarda «Gabapentın-NAN» preparaty 1 mıllıon belarýs rýblinen astam somaǵa satylǵan.

Aıta keteıik, byltyr jeltoqsanda gonoreıaǵa qarsy jańa dári jasalǵanyn jazdyq.