Belarýs elinde Qazaqstannyń saýda úıi ashylady
ASTANA. KAZINFORM – Mınskide Qazaqstannyń saýda ekonomıkalyq mıssııasy ótip jatyr. Mıssııanyń basty baǵyty Qazaqstannyń saýda úıin qurý jumystaryn bastaý boldy. Saýda úıi Belarýs naryǵynda qazaqstandyq taýarlardyń turaqty ókildigine aınalady. Bul týraly Saýda jáne ıntegratsııa mınıstrligi habarlady.
Joba kezeń boıynsha júzege asyrylyp, eki el kompanııalary arasyndaǵy iskerlik baılanystardy nyǵaıtýǵa jáne yntymaqtastyqty keńeıtýge baǵyttalǵan. Barlyq jumys kezeńin QR Saýda jáne ıntegratsııa mınıstrligi janyndaǵy QazTrade úılestiredi. Alǵashqy kezeńde qazaqstandyq ónimderdiń tizimi anyqtalyp, olardy Belarýs eliniń bólshek saýda jelilerine shyǵarý arnalary aıqyndaldy.
Kelesi kezeńderde ónim assortımentin keńeıtý, seriktestik baǵdarlamalardy damytý jáne oflaın saýda alańyn ashýǵa daıyndyq júrgizý josparlanyp otyr.
Saýda jáne ıntegratsııa mınıstri Arman Shaqqalıev bul bastamanyń Qazaqstan taýarlaryn Belarýs naryǵyna júıeli túrde ilgeriletýge múmkindik beretinin atap ótti. Mınskidegi jumys sapary aıasynda QR Saýda jáne ıntegratsııa mınıstri Arman Shaqqalıevti Belarýs Respýblıkasynyń Premer mınıstri Aleksandr Týrchın qabyldady.
Taraptar kelissóz barasynda Belarýs Respýblıkasynda QazTrade bazasynda Qazaqstannyń saýda úıin qurý týraly ýaǵdalasty. Sondaı-aq taraptar ekijaqty saýda-ekonomıkalyq yntymaqtastyqtyń qazirgi jaǵdaıyn talqylap, taýar aınalymynyń turaqty ósimi men ony odan ári arttyrý áleýetin atap ótti.
– Biz ózara saýda kólemin arttyrýdyń naqty áleýetin kórip otyrmyz. Qazaqstan kompanııalary jańa naryqtardy ıgerýge daıyn. Usynylyp otyrǵan mehanızm bul jumysty tıimdi júrgizýge jol ashady, – dedi Arman Shaqqalıev.
2025 jyldyń segiz aıynda Qazaqstan men Belarýs arasyndaǵy taýar aınalymy 739,5 mıllıon dollarǵa jetip, ótken jyldyń sáıkes kezeńimen salystyrǵanda 19,9 paıyzǵa ósti. Qazaqstannyń Belarýsqa eksporty 183,2 mıllıon dollarǵa jetip, 55,2 paıyzǵa artty. Belarýstan Qazaqstanǵa ımport kólemi 556,3 mıllıon dollar bolyp, 11,6 paıyzǵa kóbeıdi. Ónerkásip kooperatsııasy da yntymaqtastyqtyń negizgi baǵyttarynyń biri retinde qarastyryldy.
Qazirgi ýaqytta jalpy quny 204 mıllıon dollar bolatyn 12 birlesken joba iske asyrylyp jatyr. Atalǵan jobalar aıasynda shamamen 1,7 myń jańa jumys orny qurylyp jatyr. Birlesken kásiporyndarda traktorlar, astyq jáne mal azyǵyn jınaý kombaındary, qozǵaltqyshtar, órt sóndirý jáne kommýnaldyq tehnıka, lıft jabdyqtary, karer jáne shahta tehnıkasy qurastyrylady.
Qazir óndiristerdiń lokalızatsııa deńgeıin arttyrý jáne ónim shyǵarý kólemin keńeıtý boıynsha jumys júrgizilip jatyr. Aleksandr Týrchın Qazaqstanmen qarym qatynas Belarýs úshin mańyzdy ekenin atap ótti.
– Qazaqstan Respýblıkasymen qarym qatynasymyz erekshe mártebege ıe. Eki el basshylarynyń kúsh jigeriniń arqasynda qalyptasqan bul qatynastardy biz joǵary baǵalaımyz. Barlyq máseleler Úkimettiń erekshe baqylaýynda, – dedi ol.
Mıssııa aıasynda bıznes forým men ekijaqty kelissózder ótti. Kompanııalar jańa yntymaqtastyq baǵyttaryn talqylady. QazTrade jáne Belarýs ámbebap taýar bırjasy bırjalyq saýda salasynda birlesip jumys isteýge ýaǵdalasty. Sondaı aq QazTrade pen Ulttyq marketıng ortalyǵy analıtıkalyq derekter almasý jáne taýarlardy ilgeriletý máseleleri boıynsha memorandýmǵa qol qoıdy. Bul kelisimder qazaqstandyq óndirýshilerdiń Belarýs naryǵyna shyǵýyn jeńildetip, eki eldiń ekonomıkalyq baılanystaryn odan ári nyǵaıtady.
Aıta keteıik, elordada alǵash ret Qazaqstan-Belarýs agrarlyq forýmy ótedi.