Belarýs eliniń eń qymbat fýtbolshysy «Tobylǵa» aýysty
QOSTANAI. QazAqparat - Qostanaıdyń «Tobyly» qysqy transferlik maýsym kezinde quramyn birneshe jańa oıynshylarmen tolyqtyrdy, dep habarlaıdy QazAqparat klýbtyń baspasóz qyzmetine silteme jasap.
«BATE» klýbynyń eks-shabýylshysy Mıhaıl Gordeıchýk mansabyn «Tobylda» jalǵastyrady. Belarýs eliniń 6 dúrkin chempıony Qazaqstanda dúnıege kelgen. Fýtbolshy mansabyn «Shahter» klýbynda bastady. 2007 jyly 19 oıyn ótkizip, 3 gol soqqan. Shabýylshy buǵan deıin «Volna», «Naftan», «Belshına» jáne BATE komandalarynyń jeıdesin kıgen. Ulttyq qurama sapynda 25 kezdesý ótkizip, 4 márte kózge túsken.
Mıhaıl Gordeıchýk qostanaılyq klýbpen 2 jylǵa kelisimshartqa otyrdy.
Transfermarkt.de saıtynyń málimeti boıynsha, Gordeıchýk óz eliniń eń qymbat fýtbolshysy sanalady. Onyń quny - 2 mıllıon evro.
Qostanaı komandasymen 2 jylǵa kelesimshart jasasqandardyń qatarynda qaqpashy Andreı Pasechenko da bar. «Atyraýdyń» eks-qaqpashysy 2018 jylǵy maýsymda 1527 mınýt óner kórsetti. 17 gol engizip alsa, 47 soqqyny qaıtaryp, 13 seıv jasady. Byltyrǵy úzdik qaqpashylardyń tiziminde 14-shi orynǵa jaıǵasty. Ol 2012 jyly Qazaqstan fýtbol lıgasynyń úzdik qaqpashysy atandy.
Jas fýtbolshy Rýslan Valıýllın de «Tobyl» quramyna alyndy. Jartylaı qorǵaýshy qostanaılyq klýbta 2 jyl dop tebedi. Rýslan Valıýllın ótken maýsymda «Aqtóbeniń» sapynda dop tepti. Oǵan deıin oraldyq «Aqjaıyqtyń» namysyn qorǵap kelgen bolatyn.
Foto: fcbate.by
