Belarýs elinde Qazaqstannyń mádenı kúnderi ótti
Mádenıet kúnderiniń ashylýy aldynda Belarýs Respýblıkasynyń mádenıet vıtse-mınıstri Natalıa Karchevskaıa, QR Mádenıet jáne sport mınıstriniń keńesshisi Baýyrjan Qaraǵyzuly, Belarýs elindegi Qazaqstannyń Tótenshe jáne Ókiletti elshisi Ermuhamet Ertisbaev jáne basqa da qonaqtar memlekettik fılarmonııa zalynda ashylǵan kórmemen tanysty.
Elimizdiń tarıhy, mádenıeti men geografııasyn baıandaıtyn beınerolıkter men fotosýretter qoıylǵan kórme qonaqtaryn ulttyq kıimdegi batyrlar men qazaq arýlary qarsy aldy.
Odan keıin N.Tilendıev atyndaǵy akademııalyq folklorly-etnografııalyq «Otyrar sazy» orkestri men memlekettik akademııalyq sımfonııalyq orkestriniń qatysýymen gala-kontsert ótti.
«Sizderdi Qazaqstan Respýblıkasynyń Belarýs respýblıkasyndaǵy mádenıet kúnderiniń ashylýymen shyn júrekten quttyqtaımyn. Búgingideı mádenı is-sharalar arqyly eki el arasyndaǵy dostyq baılanystyń nyǵaıa túsetinine senimdimin. Kontsertten bólek arnaıy qoıylǵan kórmeden qazirgi Qazaqstannyń jarqyn beıneleri men turmys-tirshiligin tamashalaı alasyzdar », - dedi QR Mádenıet jáne sport mınıstriniń keńesshisi Baýyrjan Qaraǵyzuly.
Atalǵan sharany «Rýhanı jańǵyrý» baǵdarlamasy aıasynda Mádenıet jáne sport mınıstrligi uıymdastyrdy.
«Qazaqstannyń Belarýs elindegi mádenı kúnderi - eń aldymen eki el arasyndaǵy shynaıy dostyqtyń kórinisi. Osyndaı sharalardyń negizinde memleketter arasyndaǵy saıası-ekonomıkalyq jáne mádenı-rýhanı qarym-qatynas tereńdeı túsedi. Qazaq halqy degende eń birinshi esimizge túsetini - Uly Otan soǵysy jyldary Belarýs elin soǵys órtinen alyp shyǵý men qorǵaýda qosqan úlesterińiz. Sonyń bir dáleli - bárińiz bilesizder, Otan qorǵaýdaǵy árbir 10 oqtyń 9-y Qazaqstanda shyǵaryldy. Sol kezden bastaý alǵan tarıhı baýyrlastyq qazirgi kúnge deıin jalǵasyn taýyp keledi. Búgingi mádenı kesh - sonyń kýási, al óner - kez-kelgen halyqty til tabystyra biletin erekshe kúsh», - dedi Belarýs respýblıkasy mádenıet mınıstriniń birinshi orynbasary Natalıa Karchevskaıa.
Óz kezeginde elimizdiń Tótenshe jáne Ókiletti elshisi Ermuhamet Ertisbaev eki el arasyndaǵy mádenı jáne ekonomıkalyq qarym-qatynastyń mańyzyna toqtalyp ótti.
«Osydan bir jyl buryn Mınskide Qazaqstan men Belarýs basshylarynyń resmı kezdesýi ótip, onda 2026 jylǵa deıingi áleýmettik-ekonomıkalyq kelisimder jasaldy. Qazaqstan tarapynan burynǵy Keńes odaǵy elderi arasynda tek Belarýs elimen ǵana osyndaı uzaqmerzimdi seriktestik jasalǵan dep aıtýǵa bolady. Elbasy Nursultan Nazarbaev eki el arasyndaǵy taýar aınalymyn 1 mlrd dollarǵa deıin ulǵaıtý jóninde tapsyrma berdi. Ekonomıkalyq baılanystan bólek, eki halyqtyń dostyq qarym-qatynasyn odan ári nyǵaıtýda mádenı sharalardyń mańyzy erekshe. Osy turǵyda sizder úshin búgin Qazaqstannyń ónerpazdary óner kórsetedi», - dedi ol.
Gala-kontsert sońynda Belarýs eliniń mádenıet vıtse-mınıstri qazaq delegatsııasyna yqylas gúlin tabys etti.
Aıta ketsek, eki el arasyndaǵy dıplomatııalyq qarym-qatynas 1992 jyldyń 16 qyrkúıeginen bastaý alǵan. Belarýs elindegi Qazaqstan elshiligi 1993 jyly 9 qańtarda ashylsa, tıisinshe bizdiń elde Belarýs respýblıkasynyń elshiligi 1997 jyldyń 13 shildesinen bastap jumys istep keledi.
