Belarýs aýmaǵynan munaı tasymaldaý quny qymbattady

MINSK. BelTA-QazAqparat – Belarýstyń Monopolııaǵa qarsy retteý jáne saýda mınıstrligi el aýmaǵynan munaı tasymaldaý tarıfterin 2019 jylǵy 1 qyrkúıekten bastap 3,7% kóterý týraly qaýly qabyldady, dep habarlaıdy «QazAqparat» HAA BELTA agenttigine silteme jasap.

Bul týraly Belarýstyń Ulttyq quqyqtyq ınternet portalynda resmı jarııalanǵan.

«Reseı munaıynyń quramynda organıkalyq hlorıdter kontsentratsııasy artqandyqtan, ony Polsha, Germanııa, Chehııa jáne Vengrııanyń munaı óńdeý zaýyttary qabyldaýdan bas tartýyna baılanysty, 2019 jyldyń ІІ toqsanynda munaı tasymaldaý kólemi qysqardy. Sondyqtan «Gomeltransneft Drýjba» AAQ-nyń 2019 jyly alýy tıis tabystary qysqardy. Bul AAQ-nyń kólik júıesiniń senimdiligi men ekologııalyq qaýipsizdigin qamtamasyz etýge baǵyttalǵan ınvestıtsııalyq baǵdarlama aıasyndaǵy qajetti sharalardyń oryndalmaýyna ákep soqtyrýy múmkin», - delingen málimdemede.

Sonyń ornyn toltyrý maqsatynda mınıstrlik el aýmaǵynan munaı tasymaldaýdyń tarıfin arttyryp otyr.

Onyń aldynda, Belarýs pen Reseı tamyz aıynyń basynda munaıdy Belarýs aýmaǵy arqyly tasymaldaý qunyn 1 qyrkúıekten bastap 3,7% arttyrýǵa kelisken.