Belarýs armııasyna drondardy lazermen joıatyn jańa qarý túrin engizdi
ASTANA. KAZINFORM – Belarýs armııasy ushqyshsyz ushý apparattaryn lazer sáýlesimen joıýǵa arnalǵan otandyq «Shafran» keshenin qarý-jaraq qataryna qabyldady, dep habarlaıdy TASS.
Bul týraly Belarýs memlekettik áskerı-ónerkásip komıtetiniń tóraǵasy Dmıtrıı Pantýs «Belarýs-1» telearnasyna bergen suhbatynda málimdedi.
Onyń aıtýynsha, qazirgi áskerı ónerkásiptiń basty baǵyttarynyń biri – ushqyshsyz ushý apparattaryna qarsy tıimdi qorǵanys júıelerin ázirleý.
– Búginde bizdiń saladaǵy negizgi baǵyt, árıne, ushqyshsyz ushý apparattaryna qarsy kúres bolyp otyr. Bul rette belgili bir jetistikterge qol jetkizdik. Máselen, óz elimizde jasalǵan «Shafran» lazerlik kesheni qarý-jaraq qataryna sátti qabyldandy. Qazir onyń qýatyn, áreket etý qashyqtyǵyn jáne basqa da taktıkalyq-tehnıkalyq sıpattamalaryn jaqsartý úshin jańǵyrtý jumystaryn jalǵastyryp jatyrmyz, – dedi Dmıtrıı Pantýs.
Komıtet málimetinshe, «Shafran» kesheni áýe keńistigin radıolokatsııalyq jáne optıkalyq-elektrondyq quraldar arqyly baqylaı alady. Ol 4 500 metrge deıingi qashyqtyqtan drondardy anyqtap, qýatty lazer sáýlesiniń kómegimen 1 500 metrge deıingi aralyqta joıa alady.
2025 jyldyń qarashasynda keshen synaqtan sátti ótip, tıimdiligin rastaǵan bolatyn.
Dmıtrıı Pantýstyń aıtýynsha, Belarýs radıoelektrondyq kúres quraldaryn jetildirýge de erekshe nazar aýdaryp otyr. Sońǵy alty aıda tómen bıiktikte ushatyn nysandardy anyqtaıtyn otandyq eki zamanaýı stantsııa áskerdiń qarý-jaraq qataryna engizilgen.
Al eldiń qorǵanys mınıstri Vıktor Hrenın drondarǵa qarsy kúres quraldarynyń mańyzy artyp kele jatqanyn atap ótti.
– Buryn oıynshyq retinde qabyldanǵan drondar búginde urys dalasynda kóptegen mindetti atqaratyn asa qaýipti qarýǵa aınaldy. Olarǵa qarsy tıimdi kúresýdiń jolyn qazir búkil álem izdep jatyr. Bizdiń ǵalymdarymyz ben óndirýshilerimiz de osy baǵytta jumys júrgizýde, – dedi mınıstr.
Onyń sózinshe, mundaı qorǵanys júıeleri bir mezgilde ondaǵan myń dron qoldanylýy múmkin jaǵdaılarǵa daıyn bolý úshin qajet.
Aıta keteıik, buǵan deıin Izraıl ǵarysh keńistiginen nysanalarǵa soqqy jasaýǵa múmkindik beretin lazerlik qarý júıesin ázirlep jatqany habarlanǵan bolatyn.
