Belarýs 2021 jyly hokkeıden álem chempıonatyn ótkizý quqyǵynan aıyryldy
NUR-SULTAN.QazAqparat – Belarýs Respýblıkasy 2021 jylǵy hokkeıden álem chempıonatyn ótkizý quqyǵynan aıyryldy. Halyqaralyq hokkeı federatsııasy (IIHF) osyndaı sheshim shyǵardy, dep habarlaıdy QazAqparat.
IIHF taratqan resmı málimdemege súıensek, bastapqyda Mınsktegi Álem chempıonaty 2021 jylǵy 21 mamyr men 6 maýsym aralyǵyna josparlanǵan. Belarýs elindegi saıası jaǵdaılarǵa baılanysty birqatar elder, uıymdar men demeýshiler Mınskke barýǵa qarsy boldy.
«IIHF qaýipsizdik máselelerin eskere otyryp, búgin 2021 jylǵy hokkeıden Álem chempıonatyn Mınskiden kóshirý kerektigin rastady. Bul sheshimdi keńes uzaq talqylaýdan keıin qabyldady. IIHF Chempıonattyń barlyq qatysýshylarynyń jaǵdaıyna qaraýǵa mindetti. Kelissózder barysynda táýelsiz sarapshylar men barlyq múddeli taraptar eldegi saıası tolqýlarmen jáne COVID-19 máselelerin eskerdi. Protsestiń sońǵy kezeńi ótken aptada Belarýs Úkimetimen kezdesý jáne táýelsiz saraptamalyq esep daıyndaýdan keıin talqylandy», delingen federatsııa habarlamasynda.
Álem chempıonatynyń endi qaı jerde ótetini týraly sheshim qabyldanǵan joq. IIHF bul máseleni zerttep, álem chempıonatyn bir lokatsııada ótkizýdi talqylaıdy. Buǵan deıin Latvııa memleketi jarysty uıymdastyrýǵa daıyn ekenin málimdegen.
Eske salaıyq, Qazaqstan quramasy 2021 jylǵy álem chempıonatyna qatysady.
