Belgııanyń densaýlyq saqtaý mınıstri dúkende uzaq kezekte turmaýǵa shaqyrdy

BRıÝSSELЬ. QazAqparat – Belgııanyń federaldyq densaýlyq saqtaý mınıstri Frank Vandenbrýke jergilikti turǵyndardy «artyq saýda jasamaýǵa» shaqyrdy, dep habarlaıdy QazAqparat agenttiginiń menshikti tilshisi.

Bıyl 2 qarashadan 13 jeltoqsanǵa deıin eldegi karantın sharalarynyń kúsheıýine baılanysty kóptegen belgııalyqtar dúkenderde uzyn-sonar kezekke turyp, túrli taýarlar satyp ala bastady. Osy aptada-aq iri sýpermarketterde qajetti taýarlardy jappaı satyp alý bastaldy. Sondaı-aq, «Ikea» jıhaz dúkenderinde, «Decathlon» sporttyq dúkenderinde jáne kıim-keshek, elektr taýarlary men basqa da saýda oryndarynda halyqtyń kóp jınalýy baıqaldy.

«Eger bul asa qajet bolmasa, dúkenge toptasyp barmańyzdar», - dedi F.Vandenbrýke.

Mınıstrdiń aıtýynsha, karantın kezindegi uzyn-sonar kezekter «qaýipti», bul ınfektsııanyń odan ári taraýyna yqpal etedi. Sonymen birge, F.Vandenbrýke azyq-túlik pen qajetti bastapqy zattar satatyn dúkender ashyq qalatynyn aıtty. Barlyq dúkender onlaın rejımde tapsyrys qabyldap, úıge deıin jetkize alady.

2 qarashadan bastap Belgııada qatań lokdaýn bastalady: dúkender (azyq-túlik dúkenderinen basqa), sulýlyq salondary, shashtarazdar jabylady. Sporttyq, mádenı sharalar toqtatyldy. Qyzmetkerlerdiń kópshiligi qashyqtan jumys isteýge aýysady. Adamdardyń kóshede keshki saǵat 22-den tańǵy 6-ǵa deıin júrýine tyıym salynady.