Belgııalyq maman: Omıkron shtamy Deltany basyp ozady

BRıÝSSELЬ. QazAqparat – Belgııa úkimeti janyndaǵy saraptama tobynyń múshesi Iv Van Latemniń baǵalaýy boıynsha qazirgi ýaqytta Delta jáne Omıkron shtamdarynyń nusqalary osy elde COVID-19 juqtyrǵandarda teń dárejede, dep habarlaıdy «QazAqparat» HAA tilshisi.

Belgııalyq BAQ-qa bergen suhbatynda sarapshy I.Latem Omıkronnyń jańa nusqasy Deltany basyp ozyp, elde basym nusqaǵa aınalatynyn eskertedi.

Taǵy bir maman Gert Molenberg te Jańa jylǵa qaraı jańa nusqa Belgııadaǵy barlyq juqpaly aýrýlardyń 90-95% quraıdy dep kútedi.

«Qazirgi ýaqytta jalpy ınfektsııa deńgeıi tómendeýde, biraq kúndelikti kórsetkishter boıynsha aıyrmashylyq azyraq», - dep atap ótti G.Molenberg.

«Eger bulaı jalǵasa berse, ýaqyt óte kele ınfektsııalar shetelderde bolyp jatqandaı qaıtadan óse bastaıdy»,-deıdi.

Shyn mánisinde Sciensano ulttyq densaýlyq saqtaý ınstıtýtynyń málimetinshe, Belgııada COVID-19 pandemııasynyń kórsetkishi aıtarlyqtaı tómendegen. 15-21 jeltoqsan aralyǵynda táýligine orta eseppen 7011 tirkelgen, bul ótken aptamen salystyrǵanda 36%-ǵa kem. Belgııa úkimetiniń sheshimimen Rojdestvo qarsańynda mádenıet obektileriniń (teatrlar, murajaılar, kınoteatrlar) jumysy toqtatylyp, buqaralyq sporttyq sharalar keıinge qaldyryldy.