Belgııaǵa terrorızm qaýpi tónip tur
BRıÝSSELЬ. QazAqparat - Brıýsseldegi 3 adam qaza tapqan Eýropalyq murajaıdaǵy atystan keıin Belgııada terrorıstik qaýip deńgeıi tórtinshige deıin joǵarylady, dep habarlaıdy sheteldegi tilshimiz Dımash Syzdyqov.
Polıtsııa beınebaqylaý kameralaryndaǵy vıdeo men qylmyskerdiń sýretin ǵalamtorǵa salyp qoıdy. Alaıda ol áli kúnge deıin qolǵa túse qoıǵan joq. Ony osynaý qymysqa ne ıtermelegeni belgisiz. Tergeýshilerdiń boljamynsha, qylmysker jalǵyz ózi áreket etken.
Belgııalyq quqyq qorǵaý organdary resmı túrde terrorlyq akti dep tanylǵan bul qylmys koroldik polıtseıler men áskerılerge qarsy baǵyttalyp, jalǵasyn taba ma dep qaýiptenýde.
Belgııalyq BAQ derekterinshe, Kalashnıkov avtomatymen adamdarǵa oq jaýdyrǵan qylmysker óz qurbandaryn aldyn ala tańdaǵan. Basylymdardyń aqparatyna qaraǵanda, qaza tapqan Izraıldiń eki azamaty ızraıldik «Mossad» barlaýynyń qyzmetkeri bolýy múmkin. Olar Brıýsselge tergeý amaldaryn júrgizý úshin óz sarapshylaryn jibergen.
QazAqparat buryn habarlaǵandaı, Eýroparlamenttegi saılaý men Belgııadaǵy parlamenttik saılaýǵa bir kún qalǵanda, senbi kúni Eýropalyq murajaıda atys boldy.
