Belgııadaǵy Qazaqstan Elshiligine jergilikti turǵyndar kóńil aıtýǵa kelip jatyr

BRıÝSSELЬ. QazAqparat – Búgin Belgııadaǵy Qazaqstan Elshiliginde Jalpyulttyq aza tutý kúniniń jarııalanýyna baılanysty elimizdiń memlekettik týy tómen túsirildi. Brıýssel turǵyndary men sheteldik dıplomattar kóńil aıtý úshin QR dıpmıssııasyna kelip, kóńil aıtý kitabyna jazba qaldyryp jatyr, dep habarlaıdy QazAqparat menshikti tilshisi.

Elshiliktiń Keńesshi-Ýákili Asqar Abdrahmanovtyń aıtýynsha, QR Prezıdenti Q. Toqaevtyń jarlyǵyna sáıkes Abaı oblysyndaǵy orman órtimen kúres kezinde 14 azamattyń qaza tabýyna baılanysty 2023 jyldyń 12 maýsymy Jalpyulttyq aza tutý kúni bolyp jarııalandy.
«Osyǵan baılanysty Qazaqstan Respýblıkasynyń sheteldegi barlyq dıplomatııalyq mıssııalary memlekettik týdy túsirip, kóńil aıtý kitabyn ashty, jergilikti memlekettik organdarǵa, qoǵamdastyqqa jáne dıplomatııalyq korpýsqa osy qaıǵyly jaǵdaı týraly aqparat berdi. Elektrondyq poshtamen de hattar, adamdardyń ózderi de Elshilikke kelip jatyr. Kóńil aıtyp, sáıkes jazba qaldyrýda», - dedi qazaqstandyq dıplomat.
QR-daǵy burynǵy EO elshisi Sven-Olov Karlsson elektrondyq habarlamasynda «adamdardyń qaza tapqanyna jáne órttiń zalalyna eseńgirep qaldyq» dep atap ótti.
«Qazaqstan bıligi men halqyna kóńil aıtamyz», - dep atap ótti eýropalyq dıplomat.
Brıýsseldegi Qazaqstan elshiligine «Diplomatic world» eýropalyq iskerlik basylymynyń ókilderi de keldi.
Dıpkorpýs arasynda tanymal basylymnyń basshysy Barbara Dıtrıh Qazaqstan halqynyń qaıǵysyna ortaqtasty. Onyń aıtýynsha, iri orman órti problemasyna Eýropa da tap bolyp jatyr, ol klımattyń jahandyq ózgerýimen baılanysty.