Belgııada vaktsınalanbaǵandar arasynda aýrýhanaǵa jatqyzylǵandar sany artty
BRıÝSSELЬ. QazAqparat – Belgııada 24-30 shilde aralyǵynda jergilikti aýrýhanalarǵa koronavırýs dıagnozymen táýligine 32,9 patsıent túsýde. Bul kórsetkish aldyńǵy baqylaý kezeńimen salystyrǵanda 22%-ǵa artyq, dep habarlaıdy QazAqparat menshikti tilshisi.
30 shildede Belgııa aýrýhanalaryna koronavırýs dıagnozymen 317 adam túsken. Olardyń 96-sy ıntensıvti terapııa bólimshesinde em qabyldaýda, 45 adam jasandy tynys alý apparatyna qosylǵan. Aýrýhanaǵa túskenderdiń kópshiligi – tolyǵymen vaktsınalanbaǵandar.
Qazirgi kezeńde 6,6 mıllıonnan astam adam (Belgııanyń eresek halqynyń 71,4%-y) vaktsınanyń ekinshi dozasyn aldy.
Sondaı-aq Belgııanyń eresek halqynyń 83,4%-y koronavırýsqa qarsy vaktsınanyń birinshi dozasyn aldy. Bul 8 mıllıonǵa jýyq adamnyń ekpeniń birinshi dozasyn saldyrǵanyn bildiredi.
Koronavırýsqa shaldyǵýdyń jańa jaǵdaılarynyń sany birtindep báseńdeýde, 21-27 shilde aralyǵynda kúnine orta eseppen alǵanda 1418,3 jańa jaǵdaı anyqtalǵan. Bul bir apta burynǵy kórsetkishten 4%-ǵa az.
Sońǵy aptada KVI-ge júrgizilgen testilerdiń ortasha táýliktik sany 25%-ǵa azaıdy (orta eseppn alǵanda bir kúnde 55 285,1 testi júrgizilgen). Biraq oń nátıje bergen testiler sany 2,9%-ǵa kóbeıgen. Bul – sońǵy aılardaǵy eń joǵarǵy deńgeı.
Pandemııa bastalǵaly beri Belgııada COVID-19 juqtyrýdyń 1124715 jaǵdaıy anyqtaldy. Kóz jumǵandardyń jalpy sany 25 241 adam.
Arnur Rahymbekov
