Belgııada sýyqtan úsh adam qaza tapty
BRıÝSSELЬ. 10 aqpan. QazAqparat /Dımash Syzdyqov/ - Aqpan aıynyń basynda Eýropadaǵy qatty aıazdyń saldarynan Belgııada adamdardyń sýyqtan opat bolýynyń jaǵdaılary tirkelgen, dep habarlaıdy jergilikti BAQ-tar.
Sońǵy birneshe kún ishinde tek Belgııa elinde ǵana salqyn tııýden az degende úsh adam qaıtys boldy. Olardyń bireýi ózenge qulap, taǵy ekeýi ózderiniń úılerine jaqyn jerde úsip, kóz jumǵan. Ólimniń úsh oqıǵasy Belgııanyń frantsýz tildi aımaǵy - Vallonııada tirkelgen, mundaǵy aýanyń temperatýrasy buryn-sońdy bolyp kórmegen mınýs 20 gradýsqa deıin jetti.
Belgııalyq BAQ-nyń habarlaýynsha, sońǵy on kúnde 500-ge jýyq adam Eýropadaǵy aıazdardyń qurbandary boldy. Tońyp qalǵandar arasynda birinshi kezekte turǵylyqty jeri joq adamdar, sondaı-aq qarttar men ózderiniń kólikterinde túnep júrgen júk kólikteriniń júrgizýshileri boldy.
