Belgııada musylmandar sany artyp keledi
ASTANA. 12 qarasha. QazAqparat - Belgııada júrgizilgen statıstıkalyq zertteýlerge súıensek, 2030 jylǵa qaraı bul elde musylmandardyń sany aıtarlyqtaı artady eken. Jarııalanǵan málimetterge qaraǵanda, qazirdiń ózinde Belgııadaǵy musylmandardyń úles salmaǵy el turǵyndarynyń 10 paıyzyn qurap otyr. Bul týraly Áziret Sultan meshitiniń resmı saıty muslim.kz jazady.
Atalǵan derekterdiń ózi katolıktik Lýven ýnıversıtetiniń teology, áleýmettanýshy Olıve Serveniń 2008 jyly jasaǵan boljamyn rasqa aınaldyra túsýde. Máselen, onyń aıtýynsha, ıslam jamaǵatynyń múddesin qorǵaıtyn partııa ýaqyt óte kele Belgııanyń saıası ómirine belsene aralasyp, saılaý naýqany kezinde óz úmitkerlerin usynatyn bolady. Onyń osy sózinen keıin tórt jyl ótken soń, ıaǵnı 2012 jyldyń qazan aıynda jergilikti saılaýǵa Anderleht atty brıýsseldik kommýna keńesine «Islam» partııasynyń eki ókili saılandy. Eki ókildiń biri Redýan Arýsh - «Belgııada sharıǵat talaptaryn engizý qajet» dep ashyq málimdep júr. Ol: «Belgııa halqy Islam zańynyń artyqshylyqtaryn túsingen ýaqytta ıslamı memleket qurýǵa jol ashylady» - deıdi.
O.Serveniń qorytyndysyna sensek, Brıýsselde 15-20 jyldan keıin musylmandar kópshilikke aınalady. Ózge zertteýshilerdiń málimetteri boıynsha búgingi tańda Brıýssel turǵyndarynyń 22 paıyzyn musylmandar quraıdy. 2030 jylǵa qaraı olardyń sany 30 paıyzǵa deıin artady.
