Belgııada KVI juqtyryp, aýrýhanaǵa túskenderdiń 98 paıyzy vaktsına saldyrmaǵan

BRıÝSSELЬ. QazAqparat – Belgııanyń Sciensano ulttyq densaýlyq saqtaý ınstıtýty júrgizgen zertteý qorytyndylary COVID-19 vırýsyna qarsy vaktsınalaýdyń tıimdiligin dáleldep otyr, dep habarlaıdy QazAqparat.

Osylaısha, belgııalyq ǵalymdardyń taldaýy aǵymdaǵy jyldyń qańtar aıynan beri aýrýhanaǵa COVID-19 dıagnozymen jatqyzylǵan naýqastardyń 98 paıyzy vaktsına saldyrtpaǵanyn kórsetti.

«Sciensano» ortalyǵy vaktsınany tolyq (eki komponentin) saldyrtqan 6,2 mln belgııalq azamattyń tek 0,2% - shamamen 12 myń adam vırýs juqtyrǵanyn atap ótti.

Infektsııa juqtyrǵandardyń bul tobynyń jartysy ǵana aýrý belgileriniń bolǵanyn aıtty. Belgııada 2021 jyldyń basynan beri aýrýhanaǵa jatqyzylǵandardyń tek 2 paıyzy ǵana vaktsınany tolyq saldyrtqan, bul 400-den astam adamdy quraıdy.

Jınalǵan málimetter vaktsına saldyrtqanyna qaramastan áli de aýyryp júrgender egde jastaǵylar (ortasha jas 82) jáne kóbine áıelder ekenin (62 paıyz) kórsetti.

Vaktsına saldyrtqandardyń basym bóliginiń qosymsha aýrýlary (92 paıyz) bolǵan, al jartysy – qarttar úıiniń turǵyndary.

Vaktsınalaý kezinde aýrýhanaǵa jatqyzylǵandardyń ishinde 400 adamnyń úsheýi ǵana medıtsına qyzmetkeri.

Arnur Rahymbekov