Belgııada koronavırýsqa qarsy vaktsına birinshi bolyp Qarttar úılerine jetkiziledi
BRıÝSSELЬ. QazAqparat – Belgııada 2020 jylǵy 28 jeltoqsannan bastap halyqty koronavırýsqa qarsy vaktsınatsııalaý bastalady. Alǵashqy maquldanǵan antıdot Pfizer jáne BioNTech ázirlegen preparat bolmaq, dep habarlaıdy QazAqparat menshikti tilshisi.
Vaktsınatsııa Vallonııa, Brıýssel jáne Flandrııada ornalasqan 3 Qarttar úıinde, sondaı-aq nemistildi qaýym mekemeleriniń birinde júrgiziledi.
Bul rette Pýýrs jerindegi (Antverpen provıntsııasy) Qarttar úıindegi egde jastaǵy adamdar men medıtsına qyzmetkerleri vaktsınany alǵashqy bolyp almaq. Dál osy Pýýrsta Pfizer-BioNTech vaktsına óndirisi boıynsha álemdegi eki zaýyttyń biri ornalasqan.
Dúısenbi kúni Eýropalyq komıssııa Pfizer kompanııasynyń koronavırýsqa qarsy vaktsınasyn resmı túrde maquldady.
«Biz eýropalyqtar úshin Covid-19-ǵa qarsy alǵashqy vaktsınany qoljetimdi etý arqyly Eýropa jetistikteriniń tarıhyna mańyzdy taraý qosamyz», - dep málimdedi Eýrokomıssııanyń basshysy Ýrsýla von der Lıaıen.
«Biz ýáde etkendeı, vaktsına EO-nyń barlyq eli úshin qoljetimdi bolady», - dep atap ótti ol.
Avtor: Arnur Rahymbekov
