Belgııada Qazaqstannan keletin júkterge qatysty eshqandaı kedergi joq

BRıÝSSELЬ. QazAqparat - Beısenbi kúni Qazaqstannyń Belgııa Koroldigindegi Elshisi Marǵulan Baımuhan halyqaralyq Antverpen portynyń vıtse-prezıdenti Lıýk Arnoýtspen kezdesti, dep habarlaıdy QazAqparat tilshisi.

Kezdesý barysynda qazaqstandyq dıplomat Belgııanyń teńiz termınalynyń basshylyǵy men operatorlaryna Batys elderiniń sanktsııalaryna jatpaıtyn qazaqstandyq júkterdi kemsitpeýge shaqyrdy.

Antverpen porty basshylyǵynyń aıtýynsha, ázirge qazaqstandyq júkterdi aýystyryp tıeýdi toqtatý jaǵdaılary tirkelmegen. Sonymen qatar, EO ınstıtýttary men Belgııa federaldy úkimetiniń qazaqstandyq júkterdi buǵattaý týraly sheshimderi joq.
Halyqaralyq Antverpen teńiz portynyń vıtse-prezıdenti L.Arnoýts Antverpen portynda jumys isteıtin teńiz operatorlaryna qazaqstandyq júkterge qatysty shekteý sharalarynyń joqtyǵy týraly qosymsha habarlaıtynyna sendirdi.
Belgııanyń Antverpen teńiz porty álemdegi eń úlken 20 porttyń biri jáne Eýropalyq Odaqta 2-shi (Nıderlandydaǵy Rotterdam portynan keıin) bolyp tabylady. Port 13000 ga jerdi, 1100 km temir joldy alyp jatyr. Portta 143 myńǵa jýyq jumys orny bar jáne 1000 kompanııa jumys isteıdi, ondaǵy Belgııanyń JІÓ úlesi 4,1% quraıdy.