Belgııada qazaqstandyq JOO-nyń resmı ókildigi ashyldy
NUR-SULTAN. QazAqparat - Belgııada L.N.Gýmılev atyndaǵy Eýrazııa ulttyq ýnıversıtetiniń Internatsıonaldandyrý jáne halyqaralyq yntymaqtastyqty damytý jónindegi resmı ókildigi ashyldy. Bul týraly JOO-nyń baspasóz qyzmetinen málim etti, dep habarlaıdy QazAqparat.
Brıýssel qalasyndaǵy MERI-de (Modern Education and Research Institute) ótken ókildiktiń ashylý saltanatyna EUÝ-diń birinshi prorektory Ásemgúl Moldajanova, MERI negizin qalaýshy Aksana Pozdnıakova men Ekaterına Tsaranoka, Qazaqstannyń akademııalyq qoǵamdastyǵy, Eýropalyq odaq ókilderi qatysty.
EUÝ-diń birinshi prorektory atap ótkendeı, bul qadam otandyq bilim berýdi álemdik ǵylymı bilim berý keńistigine ıntegratsııalaýdyń negizgi faktorlarynyń biri bolyp tabylady jáne Eýropalyq odaq elderi men Qazaqstan Joǵary mektebin nyǵaıtýǵa úlken serpin beredi.
Eýropa tórinde ótken shara aıasynda L.N. Gýmılev atyndaǵy EUÝ men MERI arasynda yntymaqtastyq jónindegi memorandýmǵa qol qoıyldy.
Bul qazaqstandyq JOO-nyń shetelde ashylǵan alǵashqy ókildigi emes. Buǵan deıin oqý ornynyń Belarýs, Iran, Qytaı, Túrkııa elderinde bilim jáne ǵylym ortalyqtary ashylyp, qazirgi tańda nátıjeli jumys atqarýda.
Aıta ketken jón, saltanatty shara barysynda qazaqstandyq jáne eýropalyq buqaralyq aqparat quraldaryna arnalǵan baspasóz máslıhaty uıymdastyryldy.
