Belgııada kámelettik jasqa tolmaǵandarǵa evtanazııa qoldanýǵa ruqsat berildi
ASTANA. QazAqparat - Belgııada tómengi palata depýtattarynyń basym bóliginiń daýys berýimen kámelettik jasqa tolmaǵandar úshin evtanazııaǵa ruqsat berý týraly zań qabyldandy. Zańdy qoldap daýys bergen depýtattar sany - 86, qarsy bolǵandar - 44, qalys qalǵandar - 12. Zań jaqyn arada óz kúshine enedi, dep jazady ITAR-TASS.
Bul zań kámeletke tolmaǵan balalardyń ata-analarynyń kelisimimen nemese balanyń áreketke qabilettiligi bolmaǵan jaǵdaıda ata-anasynyń evtanazııa týraly ótinish berý quqyǵyn qarastyrady. Mundaı ótinishter bala jazylmaıtyn syrqatqa shaldyqqanda «denesinde jáne jan dúnıesinde únemi azaptar sezingende» jáne «olardy jeńildetý múmkin bolmaǵan jaǵdaıda» ǵana qanaǵattandyryla alady. Sondaı-aq balanyń «óziniń sheshimderiniń saldaryn tolyq sezinetini» týraly psıhologtyń naqtylaýy da qajet.
Jaqynda qoǵamdyq pikirge júrgizilgen saýalnamalarǵa sáıkes, Belgııada evtanazııa praktıkasyn oǵan muqııat medıtsınalyq baqylaý júrgizgen jaǵdaıda halyqtyń 75% qoldaıdy eken.
Atalmysh elde balalardyń evtanazııaǵa quqyǵyn talqylaý 2008 jyldan bastalǵan, Belgııa parlamentindegi osy máselege qatysty pikirtalastar BAQ betinde jaryq kórip otyrǵan. Zań avtorlarynyń oıynsha, ol qoldanysyn tabatyn balalar elde óte az. Olar kámelettik jasqa tolmaǵandar 1998 jyldan bastap evtanazııaǵa quqyq alǵan Nıderlandy eliniń statıstıkasyn keltiredi. Ótken 15 jyl ishinde onda kámelettik jasqa tolmaǵandar evtanazııasynyń nebári segiz jaǵdaıy ǵana tirkelgen.
