Belgııada eki poıyzdyń soqtyǵysýy saldarynan ýly zattar syrtqa tógilip, tótenshe jaǵdaı jarııalandy
BRıÝSSELЬ. 11 mamyr. QazAqparat - Búgin belgııalyq Namıýr qalasynyń janynda eki poıyzdyń soqtyǵysý saldarynan ýly zattar syrtqa tógildi, sol sebepten soqtyǵysý aýdanynda tótenshe jaǵdaı jarııalandy, dep habarlaıdy jergilikti BAQ.
Poıyzdardyń soqtyǵysýy Dınan jáne Namıýr qalalaryn baılanystyratyn belgııalyq Vallonııadaǵy temirjol jelisinde oryn alǵan. Aldyn ala málimetter boıynsha, apat Namıýr qalasynyń janyndaǵy Godın eldi mekeniniń stansasynda boldy. Munda taýarlyq poıyzdardyń biri ekinshisiniń sońǵy vagonymen soqtyǵysyp qaldy. Bul rette birneshe vagon relsten shyǵyp ketti.
Habarlanǵandaı, soqtyǵysqan poıyzdardyń biri ýly zattardy tasymaldap kele jatqan edi, sonyń saldarynan atmosferaǵa qońyr tústi bult shyqty. Kýágerlerdiń aıtýlarynsha, jaqyn jerde ornalasqan mektep oqýshylary men eldi meken turǵyndary gazdyń tutqyr ıisin sezine bastaǵan soń kóshirildi.
Soqtyǵysý aldynda poıyz kabınasynan sekirip ketken mashınısterdiń biri jeńil jaraqattar aldy. Oqıǵanyń oryn alý sebepteri anyqtalý ústinde.
