Belgııada banktik qupııanyń kúshi joıyldy
BRıÝSSELЬ. QazAqparat - Belgııada eldiń salyq rezıdentteri - barlyq jeke tulǵalary sheteldegi ózderiniń banktik esepshottary týraly derekter berýdi mindetteıtin zań kúshine endi, dep habarlady jergilikti BAQ.
Barlyq málimetter Belgııalyq ulttyq banktiń baqylaýyndaǵy jalpy derekqorǵa engiziledi. Bul eldegi banktik qupııanyń kúshin joıady.
Zań sondaı-aq Belgııadaǵy jumys istep turǵan bankter men qarjy mekemelerine óz klıentteri - jeke tulǵalardyń da, zańdy tulǵalardyń da aty-jónin, olardyń esepshottarynyń nómirin, al 2015 jyldan bastap, ıpotekany qosa alǵanda kredıttik kelisimsharttar týraly derekterdi, sonymen birge jyljymaıtyn múlik pen avtomobılder lızıngi boıynsha sharttardy jalpy derekqorǵa engizýdi mindetteıdi.
Belgııa salyq qyzmeti bul derekqorǵa tolyqtaı kire alady, sondaı-aq Eýroodaqtyń basqa da memleketteriniń, banktik aqparat almasý týraly shart jasasqan úshinshi elderdiń salyq qyzmetkerlerimen atalǵan aqparatty almasýǵa quqyǵy bolady.
