Belgııada aryqtaý úshin dıabetke qarsy dári-dármekti qoldaný beleń aldy

BRıÝSSELЬ. QazAqparat - Belgııanyń qant dıabetimen aýyratyn naýqastardy biriktiretin dıabet lıgasy jergilikti dárigerlerdi aýyr syrqaty joq adamdarǵa Ozempık (Ozempic) medıtsınalyq preparatyn taǵaıyndaýdy toqtatýǵa shaqyrady, dep habarlaıdy QazAqparattyń menshikti tilshisi.

Flamandtyq VRT telearnasy Ozempic preparaty 2 tıpti qant dıabetimen aýyratyn adamdarda qandaǵy qant deńgeıin retteýge arnalǵan dep habarlaıdy. Alaıda, preparat qant dıabeti joq, artyq salmaqtan arylǵysy keletin adamdar arasynda tanymal.

Telearnanyń málimetinshe, qazir Belgııada Ozempic-ke suranys aıtarlyqtaı artqan, dárilik preparatqa naǵyz muqtaj adamdardyń ózine ony dárihanadan tabý qıynǵa soǵyp otyr.

Belgııalyq farmatsevterdiń dári-dármektiń bar-joǵyn tekserý úshin paıdalanatyn jergilikti veb-saıtynda preparattyń 9 qyrkúıekke deıin joq ekendigi kórsetilgen.

Dıabet lıgasynyń ókili Lıýk Baıs bul dári-dármekti salmaq joǵaltý úshin de qoldanýǵa bolatyndyǵyn atap ótti.

«Dári-dármektiń tıimdi ekeni týraly ǵylymı dálelder bar, biraq ol Belgııada artyq salmaqtan arylý quraly sanalmaıdy», - dedi ol.

Belgııanyń jalpy farmatsevtıka federatsııasynyń qyzmetkeri Maıkl Storme keıbir dárigerler Ozempic-ti salmaq joǵaltýǵa arnalǵan dári retinde taǵaıyndaıtynyn aıtty.

Foto:vrt.be