Belgııada 19 tilde sóıleıtin qultemir aýrýhanaǵa «jumysqa ornalasty»
ASTANA. QazAqparat - Belgııanyń Ostende qalasyndaǵy aýrýhana qyzmetkerleriniń qatary tolyqty. 19 tilde sóılep, muqtaj janǵa járdem berýden sharshamaıtyn «Pepper» esimdi qultemir naýqastarǵa ǵana emes, medbıkege, tipti aýrýhanada jatqandardyń halin surap, kelgenderge de kómek beredi. Jurt «Pepchık» dep atap ketken robot baǵdarlamasyn jergilikti ZORA BOTS fırmasy jasap shyqqan, dep jazady 24.kz.
Bul - Pepperdiń atqaratyn kúndelikti jumysy. Ol aýrýhanaǵa kelgenderdi kútip alyp, suraqtaryna jaýap berip, jol kórsetedi. Qajet bolsa, medbıkelerge de neniń qaıda turǵany týraly aqparat bere alady. Qultemir baǵdarlamasyn jasap shyǵarǵan kompanııa basshysy «onyń negizgi mindeti - kelýshilerge durys aqparat berip, jaǵymdy kóńil-kúı syılaý» deıdi.
«Boıy - nebári 120 santımetr. Pishini de fılmderdegi zulym qultemirler sııaqty emes, súıkimdirek. Adamdar oǵan jyly qabaqpen qaraıdy. Bir jaqsysy, eshkimniń jumys ornyn tartyp alǵan joq jáne qyzmetke talaspaıdy», - deıdi ZORA BOTS kompanııasynyń basshysy Fabrıs Goffen.
«Pepperdiń» salmaǵy 28 keli jáne saǵatyna úsh shaqyrym jyldamdyqpen kozǵala alady. Mamandardyń aıtýynsha, qultemir - qozǵalysy qıyn naýqastarǵa kómek berýge taptyrmas qural. Sondyqtan kóbine sábıler men qarttar bólimine qoıylady.
«Pepper» Ostende qalasyndaǵy «Az Damıan» aýrýhanasynda qyzmetke alynǵan alǵashqy qultemir emes. Buǵan deıin munda sóıleı bilmeıtin kishkentaı ǵana «Zora» atty robot bolǵan. Ol naýqastardyń fızıoterapııamen aınalysýyna kómek bergen.
